ఎలక్ట్రిక్ స్కూటర్ల విభాగంలో బజాజ్ చేతక్ అమ్మకాలు దూసుకెళ్తున్నాయి. గత ఏడాది జూలైలో 11,584 యూనిట్లు అమ్ముడవ్వగా, ఈ ఏడాది జూలైలో ఆ సంఖ్య 47,184కు చేరింది. దీంతో ఏడాది వ్యవధిలోనే అమ్మకాలు 307 శాతం పెరిగాయి. జూన్ నెలలో 40,376 స్కూటర్లు అమ్ముడవ్వగా, జూలైలో మరో 17 శాతం వృద్ధి నమోదైంది.
ఒకప్పుడు భారతీయులకు ఇష్టమైన స్కూటర్గా ఉన్న చేతక్ను, ఆటోమేటిక్ స్కూటర్ల రాకతో బజాజ్ మార్కెట్ నుంచి తొలగించింది. అయితే 2019లో పెట్రోల్ ఇంజిన్కు బదులుగా ఎలక్ట్రిక్ మోటార్తో ఈ వాహనాన్ని మళ్లీ కంపెనీ తీసుకొచ్చింది. ప్రస్తుతం ఇది బజాజ్ సంస్థకు అత్యంత కీలకమైన ఉత్పత్తిగా మారింది.
ఈ స్కూటర్లు వేర్వేరు బ్యాటరీ సామర్థ్యాలు, ప్రయాణ దూరంతో అందుబాటులో ఉన్నాయి. 2.5kWh బ్యాటరీ ఉన్న బేస్ మోడల్ 113 కిలోమీటర్ల రేంజ్ ఇస్తుందని కంపెనీ చెబుతోంది. దీని ధర రూ.91,504 నుంచి మొదలవుతుంది. అలాగే 3.0kWh బ్యాటరీ ఉన్న మోడల్ 131 కిలోమీటర్ల దూరం ప్రయాణిస్తుంది, దీని ధర రూ.1,14,270గా ఉంది.
అత్యధికంగా 3.5kWh బ్యాటరీ ఉన్న చేతక్ 35 సిరీస్ 153 కిలోమీటర్ల రేంజ్ను అందిస్తుంది. దీని ప్రారంభ ధర రూ.1,24,157గా ఉంది. ఈ మోడల్ నిర్వహణ ఖర్చు చాలా తక్కువని కంపెనీ పేర్కొంటోంది. ఇంట్లో బ్యాటరీని పూర్తిగా ఛార్జ్ చేయడానికి సుమారు రూ.35 ఖర్చవుతుందని, ఆ విద్యుత్ ఖర్చుతోనే 153 కిలోమీటర్ల వరకు ప్రయాణించవచ్చని బజాజ్ వెల్లడించింది.
భారతదేశంలో ఎలక్ట్రిక్ స్కూటర్లకు పెరుగుతున్న ఆదరణకు ఈ అమ్మకాల వృద్ధి ఒక నిదర్శనమని కంపెనీ భావిస్తోంది. తక్కువ నిర్వహణ వ్యయం, ఎక్కువ దూరం ప్రయాణించే సామర్థ్యం, పాత చేతక్ బ్రాండ్పై ఉన్న నమ్మకం వంటి అంశాలు వినియోగదారులను ఆకర్షిస్తున్నాయి.
