ఆధునిక జీవనశైలిలో చాలా మందిని వేధిస్తున్న మధుమేహం, అధిక రక్తపోటు మరియు కొలెస్ట్రాల్ సమస్యలను అదుపు చేయడానికి బార్లీ గింజలు సమర్థవంతంగా పనిచేస్తాయని ఆరోగ్య నిపుణులు అభిప్రాయపడుతున్నారు. ప్రతిరోజూ ఉదయమే ఈ ధాన్యం తయారు చేసిన జావాను తీసుకోవడం వల్ల దీర్ఘకాలిక వ్యాధులను నివారించవచ్చు. ముఖ్యంగా ఇందులో ఉండే పొటాషియం రక్తపోటును అదుపులో ఉంచితే, పీచుపదార్థాలు కొలెస్ట్రాల్ స్థాయిలను తగ్గించి గుండె ఆరోగ్యాన్ని కాపాడతాయి.
మధుమేహ నియంత్రణలో ఈ ధాన్యం కీలక పాత్ర పోషిస్తుంది. ఇందులోని ఫైబర్ రక్తంలో చక్కెర నెమ్మదిగా విడుదలయ్యేలా చేయడం వల్ల గ్లూకోజ్ స్థాయిలు ఆకస్మికంగా పెరగవు. ఇది డయాబెటిస్ ఉన్నవారికి మాత్రమే కాకుండా, భవిష్యత్తులో ఈ వ్యాధి రాకుండా నివారించడానికి కూడా ఉపయోగపడుతుంది. అలాగే జీర్ణవ్యవస్థను మెరుగుపరచి, మలబద్ధకాన్ని నివారించడంతోపాటు శరీరంలోని విషపదార్థాలను మూత్రం ద్వారా బయటకు పంపి మూత్రపిండాల పనితీరును మెరుగుపరుస్తుంది.
బరువు తగ్గాలనుకునే వారికి ఇది ఒక సహజసిద్ధమైన పరిష్కారం. ఎక్కువ పీచుపదార్థాలు ఉండటం వల్ల కడుపు నిండుగా ఉండి, అతిగా తినకుండా నిరోధిస్తుంది. దీనివల్ల శరీర మెటబాలిజం క్రమబద్ధీకరించి బరువు తగ్గడం సులభమవుతుంది. అంతేకాకుండా విటమిన్ ఎ కంటిచూపును కాపాడగా, ఐరన్ రక్తహీనతను నివారించి రక్తకణాల ఉత్పత్తికి దోహదపడుతుంది. కాల్షియం, ఫాస్ఫరస్ ఎముకల సాంద్రతను పెంచి వాటిని బలంగా మారుస్తాయి.
ఈ ఆరోగ్యకరమైన పానీయాన్ని తయారు చేయడం చాలా సులభం. ఒక గుప్పెడు బార్లీ గింజలను ఒక లీటరు నీటిలో వేసి 10 నుండి 15 నిమిషాలు బాగా మరిగించాలి. వడగట్టిన ఆ నీటిలో సగం నిమ్మకాయ రసం, ఒక చెంచా తేనె కలిపి ఉదయం పరగడుపున తాగాలి. లేదా రెండు స్పూన్ల బార్లీ పొడిని నీటిలో కలిపి మరిగించి కూడా సేవించవచ్చు. ఈ సాధారణ అలవాటు శరీరాన్ని రిఫ్రెష్ చేయడంతోపాటు సమగ్ర ఆరోగ్యాన్ని అందిస్తుంది.
