అత్యాధునిక AI మోడళ్లు, సెమీకండక్టర్ చిప్ డిజైన్ల ఎగుమతులపై కఠిన నిబంధనలు తీసుకురావాలని చైనా ప్రభుత్వం యోచిస్తోంది. జాతీయ ప్రయోజనాల పరిరక్షణ, సైబర్ సెక్యూరిటీని బలోపేతం చేసే లక్ష్యంతో ఈ ప్రతిపాదనలను పరిశీలిస్తున్నట్లు అంతర్జాతీయ మీడియా కథనాలు వెల్లడించాయి. ఈ నిబంధనలు అమల్లోకి వస్తే ప్రపంచ టెక్నాలజీ రంగంపై గణనీయమైన ప్రభావం పడే అవకాశం ఉంది.
ఈ దిశగా చైనా ప్రభుత్వం అలీబాబా, బైట్డాన్స్, జిపు వంటి ప్రముఖ AI కంపెనీలతో ఇప్పటికే చర్చలు జరుపుతోంది. అత్యాధునిక AI మోడళ్లను వ్యూహాత్మక జాతీయ ఆస్తిగా పరిగణించాలని ప్రభుత్వం భావిస్తోంది. దీనివల్ల ఈ సాంకేతికత దేశం దాటి వెళ్లకుండా అడ్డుకోవడంతో పాటు, శిక్షణ డేటా విదేశాలకు చేరకుండా నియంత్రణలు విధించే అవకాశం ఉంది. విదేశీ వినియోగదారులు AI మోడళ్లను డౌన్లోడ్ చేసుకోకుండా పరిమితులు విధించే అంశం కూడా చర్చల్లో ఉంది.
మరోవైపు, క్వాల్కామ్, టీఎస్ఎంసీ వంటి విదేశీ చిప్ తయారీ సంస్థలు చైనా డిజైన్లను ఉపయోగించకుండా కొత్త మార్గదర్శకాలను తీసుకురావాలని చైనా యోచిస్తోంది. సెమీకండక్టర్ డిజైన్లపై పూర్తి నియంత్రణ సాధించడమే దీని ఉద్దేశ్యం. ప్రస్తుతం ఎగుమతి నియంత్రణ జాబితాలో వీటిని చేర్చే అంశాన్ని ప్రభుత్వం పరిశీలిస్తోంది. ఒకవేళ ఈ ఆంక్షలు అమల్లోకి వస్తే రక్షణ, ఆటోమొబైల్, డేటా సెంటర్లు, ఎలక్ట్రానిక్స్ పరిశ్రమలపై ప్రభావం పడుతుందని నిపుణులు భావిస్తున్నారు.
ప్రస్తుతం సెమీకండక్టర్ తయారీలో తైవాన్, దక్షిణ కొరియా, అమెరికా దేశాలు ముందుండగా, చైనా చిప్ ప్యాకేజింగ్ వంటి విభాగాల్లో కీలకంగా ఉంది. ఇటీవలే హీలియం ఎగుమతులపై ఆంక్షలు విధించిన చైనా, ఇప్పుడు AI, చిప్ టెక్నాలజీలపై దృష్టి సారించింది. ఈ నిర్ణయాలపై అధికారిక ప్రకటన వెలువడితే ప్రపంచ టెక్ మార్కెట్లో కీలక మార్పులు చోటుచేసుకునే అవకాశం ఉంది.
