రవితేజ, ప్రియా భవానీ శంకర్ ప్రధాన పాత్రల్లో నటించిన ‘ఇరుముడి’ సినిమా ఆగస్టు 21న ప్రేక్షకుల ముందుకు రానుంది. మైత్రి మూవీ మేకర్స్ నిర్మించిన ఈ చిత్రాన్ని శివ నిర్వాణ తెరకెక్కించారు. ఇప్పటికే విడుదలైన పాటలు, ట్రైలర్తో సినిమాపై అంచనాలు పెరిగాయని చిత్ర బృందం చెబుతోంది.
ఈ సినిమాలో అయ్యప్ప స్వామి మాల, ఫ్యామిలీ ఎమోషన్స్, క్రైమ్ అనే మూడు ప్రధాన అంశాలు ఉంటాయని దర్శకుడు శివ నిర్వాణ తెలిపారు. రామ్ చరణ్ ఈ సినిమాలో నటిస్తున్నారనే ప్రచారం సోషల్ మీడియాలో జరుగుతున్నప్పటికీ, అది నిజం కాదని ఆయన స్పష్టం చేశారు. రామ్ చరణ్ అయ్యప్ప భక్తులు కావడం వల్లే అభిమానులు అలా అనుకుని ఉంటారని ఆయన పేర్కొన్నారు.
అయ్యప్ప స్వామి నేపథ్యంలో సినిమాలు చాలా తక్కువగా వచ్చాయని, అందుకే ఈ సినిమాను ‘మాళికాపురం’తో పోల్చారని దర్శకుడు వివరించారు. అయితే తన కథపై తనకు స్పష్టత ఉండటంతో అటువంటి పోలికల గురించి తాను పెద్దగా ఆలోచించలేదని చెప్పారు. రవితేజ గడ్డం, ఆయన తేజస్సు ఈ పాత్రకు సరిగ్గా కుదిరాయని, ఆయనతో పనిచేయడం వల్ల ఈ కథ ప్రతి ఇంటికీ చేరుతుందని శివ నిర్వాణ నమ్మకం వ్యక్తం చేశారు.
సినిమాలో ‘మల్లెపూల పల్లకి’ అనే పాటను 15 ఏళ్ల క్రితం పాడిన డప్పు శ్రీను గారితోనే మళ్లీ పాడించామని దర్శకుడు తెలిపారు. భక్తుల మనోభావాలను గౌరవించే క్రమంలోనే సీలేరు స్వామి సలహాతో ఈ నిర్ణయం తీసుకున్నట్లు ఆయన చెప్పారు. ఈ పాట థియేటర్లో ప్రేక్షకులకు మంచి అనుభూతిని ఇస్తుందని ఆయన ఆశాభావం వ్యక్తం చేశారు.
ఇక ‘మనెమ్మ’ పాత్ర కోసం ఇన్స్టాగ్రామ్ రీల్స్ ద్వారా నక్షత్రను ఎంపిక చేశామని, లుక్ టెస్ట్ తర్వాతే ఆమెను ఖరారు చేశామని దర్శకుడు వెల్లడించారు. గురుస్వామి పాత్రలో సాయికుమార్ నటన అద్భుతంగా ఉంటుందని ఆయన పేర్కొన్నారు. సీలేరులో 250 మందితో కలిసి షూటింగ్ చేయడం ఒక సవాలుగా మారిందని, నిర్మాతలు నవీన్, రవి తనకు పూర్తి స్వేచ్ఛ ఇచ్చారని శివ నిర్వాణ తెలిపారు.
