ఈనెల మూడవ తేదీన వాడలరేవు నుండి ఏడుగురు మత్స్యకారులు వేట కోసం సముద్రంలోకి వెళ్లారు. అయితే, వారు ప్రయాణిస్తున్న బోటులో సాంకేతిక లోపం తలెత్తడంతో అది సముద్రం మధ్యలోనే ఆగిపోయింది. దీంతో వారు తిరిగి రాలేక అక్కడే చిక్కుకుపోయారు.
సుమారు 23 రోజుల పాటు సముద్రంలోనే గడిపిన మత్స్యకారుల ఆచూకీ ఎట్టకేలకు లభించింది. ప్రస్తుతం వీరంతా పశ్చిమబెంగాల్ సముద్ర తీరంలో ఉన్నట్లు సమాచారం అందింది. సముద్రంలో వారు చిక్కుకున్నప్పటి వీడియో ఒకటి ఇప్పుడు బయటకు వచ్చింది.
మత్స్యకారులు సురక్షితంగా ఉన్నారనే వార్త తెలియడంతో వారి కుటుంబసభ్యులు ఊపిరి పీల్చుకున్నారు. ఈ విషయంపై అమలాపురం ఎమ్మెల్యే ఆనందరావు స్పందించారు. ఆయన బాధిత కుటుంబాల వద్దకు వెళ్లి, మత్స్యకారులు క్షేమంగా ఉన్నారని చెబుతూ స్వీట్లు పంచిపెట్టారు.
ముఖ్యమంత్రి చంద్రబాబు, ఉప ముఖ్యమంత్రి పవన్ కళ్యాణ్, మత్స్యశాఖ మంత్రి అచ్చెన్నాయుడు ప్రత్యేక చొరవ తీసుకోవడం వల్లే గాలింపు చర్యలు వేగవంతమయ్యాయని ఎమ్మెల్యే తెలిపారు. వారి ప్రయత్నాల వల్లే మత్స్యకారులను గుర్తించడం సాధ్యమైందని ఆయన చెప్పారు.
మత్స్యకారులను వీలైనంత త్వరగా స్వగ్రామానికి తీసుకువస్తామని ఎమ్మెల్యే ఆనందరావు హామీ ఇచ్చారు. మరో రెండు రోజుల్లో ఈ ఏడుగురు మత్స్యకారులు తమ స్వగ్రామానికి చేరుకోనున్నారు.
