ప్రభుత్వ భూములను, వివాదాస్పద ఆస్తులను రిజిస్ట్రేషన్ చేయకుండా నిషేధించే సెక్షన్ 22ఏ (Section 22A) కింద, పొరపాటున ప్రైవేటు భూములను కూడా అధికారులు చేర్చారు. ఈ అంశంపై హైదరాబాద్, రంగారెడ్డి, మేడ్చల్, సంగారెడ్డి జిల్లాల నుంచి సుమారు 750 ఫిర్యాదులు అందాయని మంత్రి పొంగులేటి శ్రీనివాస రెడ్డి సోమవారం వెల్లడించారు.
గతంలో అర్బన్ ల్యాండ్ సీలింగ్ (ULC) జాబితాలో ఉన్న భూములను, నిషేధిత జాబితాను అప్డేట్ చేసే క్రమంలో అధికారులు పొరపాటున 22ఏ జాబితాలో చేర్చారు. ఈ తప్పిదానికి బాధ్యత వహిస్తూ, అధికారుల తరఫున ప్రజలకు క్షమాపణలు కోరుతున్నానని మంత్రి పేర్కొన్నారు.
ప్రైవేటు ఆస్తులను వెంటనే నిషేధిత జాబితా నుంచి తొలగిస్తామని మంత్రి హామీ ఇచ్చారు. దీనిపై ఏవైనా అభ్యంతరాలు ఉంటే 1800 5994788 అనే టోల్ ఫ్రీ నంబర్కు ఫిర్యాదు చేయవచ్చని, మూడు రోజుల్లోగా అధికారులు స్పందిస్తారని ఆయన తెలిపారు.
ఒకవేళ భూమి రిజిస్ట్రేషన్ కాకపోతే దానికి గల కారణాలను అధికారులు వివరిస్తారు. ఒకవేళ రిజిస్ట్రేషన్ ఫీజు చెల్లించి ఉంటే, ఆ మొత్తాన్ని తిరిగి చెల్లిస్తామని మంత్రి స్పష్టం చేశారు.
