జూలై 3, 2026న థియేటర్లలో విడుదలైన మైథలాజికల్ ఫాంటసీ యాక్షన్ చిత్రం ‘నాగబంధం’ బాక్సాఫీస్ వద్ద నిరాశపరిచింది. భారీ అంచనాలతో రూ. 110 కోట్ల వ్యయంతో రూపొందిన ఈ సినిమా, ప్రేక్షకులను ఆకట్టుకోవడంలో విఫలం కావడంతో థియేట్రికల్ రన్ త్వరగానే ముగిసింది.
ఈ నేపథ్యంలో, సినిమా విడుదలైన 21 రోజుల్లోనే డిజిటల్ వేదికపైకి తీసుకురావాలని చిత్రబృందం నిర్ణయించింది. జూలై 24, 2026 నుంచి అమెజాన్ ప్రైమ్ వీడియోలో ఈ చిత్రం స్ట్రీమింగ్ కానుంది. తెలుగుతో పాటు తమిళం, కన్నడ, మలయాళ భాషల్లో ఈ సినిమా అందుబాటులోకి రానుండగా, హిందీ వెర్షన్ విడుదలపై ఇంకా స్పష్టత లేదు.
అభిషేక్ నామా దర్శకత్వంలో వచ్చిన ఈ చిత్రంలో విరాట్ కర్ణ, నభా నటేష్, ఐశ్వర్య మీనన్ ప్రధాన పాత్రలు పోషించారు. ఎన్ఐకే స్టూడియోస్, అభిషేక్ పిక్చర్స్ సంయుక్తంగా నిర్మించిన ఈ సినిమాలో జగపతి బాబు, మహేష్ మంజ్రేకర్, మురళీ శర్మ, దక్షా నగార్కర్, రిషభ్ సాహ్నీ కీలక పాత్రల్లో కనిపించారు.
సాంకేతికంగా ఈ సినిమా కోసం వ్లాడ్ రింబర్గ్ నేతృత్వంలో యాక్షన్ సీక్వెన్స్లను రూపొందించారు. సౌందర్ రాజన్ సినిమాటోగ్రఫీ అందించగా, జునైద్ కుమార్-అభే సంగీతం సమకూర్చారు. థియేటర్లలో ఆకట్టుకోలేకపోయిన ఈ చిత్రం, ఓటీటీలో ఎలాంటి ఫలితాన్ని అందుకుంటుందో చూడాలి.
