ధరణి పోర్టల్ అమల్లోకి వచ్చిన 2020 అక్టోబర్ 29 నుంచి ఇప్పటివరకు జరిగిన భూ లావాదేవీలు, రికార్డుల మార్పులు, అక్రమాల ఆరోపణలపై లోతుగా విచారించేందుకు ప్రత్యేక విచారణ బృందాన్ని (SET) ఏర్పాటు చేయాలని రాష్ట్ర మంత్రివర్గం తీర్మానించింది. కేరళకు చెందిన సంస్థ నిర్వహించిన ఫోరెన్సిక్ ఆడిట్లో 10 వేలకు పైగా అనుమానాస్పద లావాదేవీలు వెలుగుచూడటంతో ప్రభుత్వం ఈ నిర్ణయం తీసుకుంది. సిద్దిపేట, మెదక్ జిల్లాల్లో ప్రారంభించిన ఈ ఆడిట్ ప్రక్రియను రాష్ట్రవ్యాప్తంగా విస్తరించారు.
ఈ విచారణలో ధరణి పోర్టల్ టెండర్ల ప్రక్రియ, సిస్టమ్ ఆర్కిటెక్చర్, డేటా భద్రత, సాఫ్ట్వేర్ రూపకల్పనలో జరిగిన లోపాలు, ఐఎల్ అండ్ ఎఫ్ఎస్ (IL&FS) సంస్థ పాత్రపై ప్రత్యేక దృష్టి పెడతారు. భూభారతి వ్యవస్థ అమల్లోకి వచ్చినప్పటికీ, పాత సాఫ్ట్వేర్లోని లోపాల వల్ల జరుగుతున్న అవకతవకలను కూడా ఈ బృందం పరిశీలిస్తుంది. బాధ్యులు ఎవరైనా సరే చట్టప్రకారం కఠిన చర్యలు తీసుకుంటామని మంత్రి పొంగులేటి శ్రీనివాస్రెడ్డి స్పష్టం చేశారు.
మరోవైపు, రాష్ట్రంలో వర్షాభావ పరిస్థితులు, ఎల్నినో ప్రభావంపై కేంద్రానికి సమగ్ర నివేదిక పంపాలని కేబినెట్ నిర్ణయించింది. ఈ నెల 20న జిల్లాల వారీగా సమీక్షలు నిర్వహించి, కరువు పరిస్థితులపై నివేదికలు సిద్ధం చేస్తారు. వీటితో పాటు ముక్తేశ్వర్ ఎత్తిపోతల పథకం పూర్తి, ధర్మపురిలో డిగ్రీ కళాశాల ఏర్పాటుకు కేబినెట్ గ్రీన్ సిగ్నల్ ఇచ్చింది.
