భారతదేశ జాతీయ గేయం వందేమాతరంపై నటి షర్మిలా టాగూర్ తన అభిప్రాయాలను పంచుకున్నారు. దేశంలోని వివిధ మతాల ప్రజల మనోభావాలను గౌరవిస్తూ, ఇంతకుముందు ఉన్నట్లుగానే ఈ గేయంలోని మొదటి రెండు చరణాలను మాత్రమే అధికారికంగా ఉంచాలని ఆమె కోరారు.
భారతదేశంలో ఒక్కడే దేవుడని నమ్మే ఏకేశ్వరోపాసనను అనుసరించే వారు కోట్లాది మంది ఉన్నారని ఆమె గుర్తుచేశారు. వందేమాతరం పూర్తి గీతంలో వివిధ దేవతల ప్రస్తావనలు ఉంటాయని, ఇవి ఇతర మతస్తులకు పాడటం లేదా పలకడం ఇబ్బందిగా మారవచ్చని ఆమె వివరించారు.
అందువల్ల, దేశంలోని అన్ని వర్గాల ప్రజలను ఐక్యంగా ఉంచేందుకు మొదటి రెండు చరణాలను మాత్రమే పాటించడం సముచితమని షర్మిలా టాగూర్ అభిప్రాయపడ్డారు. పూర్తి గేయాన్ని అందరూ ఆమోదించడం కష్టమని ఆమె పేర్కొన్నారు.
మరోవైపు, నటుడు ముఖేష్ ఖన్నా జాతీయ గీతం, జాతీయ గేయంపై భిన్నమైన వ్యాఖ్యలు చేశారు. రవీంద్రనాథ్ టాగూర్ రాసిన జన గణ మన గేయాన్ని జాతీయ గీతం హోదా నుంచి తొలగించి, దాని స్థానంలో వందేమాతరాన్ని జాతీయ గీతంగా స్వీకరించాలని ఆయన డిమాండ్ చేశారు.
జన గణ మన గేయం బ్రిటన్ రాణి ఎలిజబెత్ అభినందనార్థం రాసిందని, అది మనది కాదని ముఖేష్ ఖన్నా వాదించారు. లతా మంగేష్కర్ పాడిన వందేమాతరం మాత్రమే నిజమైన జాతీయ గేయమని ఆయన స్పష్టం చేశారు. ప్రస్తుతం ఈ వ్యాఖ్యలపై సోషల్ మీడియాలో చర్చ జరుగుతోంది.
