UPI (యూనిఫైడ్ పేమెంట్స్ ఇంటర్ఫేస్) ద్వారా చేసే లావాదేవీలపై ఎలాంటి రుసుములు ఉండవని కేంద్ర ప్రభుత్వం స్పష్టం చేసింది. P2P (పర్సన్-టు-పర్సన్) లావాదేవీలు ఎప్పటిలాగే ఉచితంగా కొనసాగుతాయని కేంద్రం తెలిపింది. దేశ పౌరులకు UPI సేవలను ఉచితంగా అందించడమే ప్రభుత్వ ప్రధాన లక్ష్యమని పేర్కొంది.
భవిష్యత్తులో మర్చంట్ డిస్కౌంట్ రేట్ (MDR) విధానాన్ని ప్రవేశపెట్టినా, అది వ్యాపారులందరికీ వర్తించదని ప్రభుత్వం క్లారిటీ ఇచ్చింది. కేవలం పరిమిత మర్చంట్ లావాదేవీలపై మాత్రమే నామమాత్రపు MDR ఛార్జీలు ఉంటాయని, ఇవి డెబిట్, క్రెడిట్ కార్డుల MDR కంటే చాలా తక్కువగా ఉంటాయని వివరించింది. మెజారిటీ మర్చంట్ లావాదేవీలు ఉచితంగానే కొనసాగుతాయని ప్రభుత్వం భరోసా ఇచ్చింది.
UPI వ్యవస్థ చాలా కాలంగా ఉన్న స్థిరత్వం కోసం పేమెంట్ అండ్ సెటిల్మెంట్ సిస్టమ్స్ యాక్ట్ (PSS Act)ను సవరిస్తున్నట్లు కేంద్రం వెల్లడించింది. సైబర్ సెక్యూరిటీని మెరుగుపరచడానికి, మోసాలను అరికట్టడానికి భారీ పెట్టుబడులు అవసరమని, UPI విస్తరణకు స్వయం-స్థిరమైన ఆదాయ నమూనా అవసరమని ప్రభుత్వం పేర్కొంది.
భారతదేశ సొంత ఆవిష్కరణ అయిన UPI ప్రస్తుతం 11 దేశాల్లో అందుబాటులో ఉంది. జూలై నెలలో దేశవ్యాప్తంగా 2,366 కోట్ల UPI లావాదేవీలు జరిగాయి. వీటి మొత్తం విలువ ₹29.9 లక్షల కోట్లుగా నమోదైంది.
