సాధారణంగా ఒక సినిమాకు ట్రైలర్ అంటే ప్రాణం వంటిది. ట్రైలర్ బాగుంటేనే సగం సినిమా హిట్టయినట్లు భావిస్తారు. అయితే, ప్యారడైజ్ సినిమాను ఎలాంటి ట్రైలర్ లేకుండానే విడుదల చేయాలని చిత్ర బృందం నిర్ణయించుకుంది.
ఈ నిర్ణయం వెనుక ఒక బలమైన సెంటిమెంట్ ఉందని చిత్ర యూనిట్ భావిస్తోంది. గత పదేళ్లలో ట్రైలర్ లేకుండా విడుదలైన పలు సినిమాలు ప్రేక్షకులను అలరించాయి. ఈ పద్ధతి ప్యారడైజ్ సినిమాకు కూడా కలిసి వస్తుందని వారు ఆశిస్తున్నారు.
ట్రైలర్ ఎందుకు విడుదల చేయడం లేదని అడిగినప్పుడు, సమయం లేదని నాని సమాధానమిచ్చారు. మరోవైపు, ట్రైలర్ విడుదల చేస్తే కథతో పాటు అందులోని ట్విస్టులు బయటకు వచ్చే అవకాశం ఉందని దర్శకుడు శ్రీకాంత్ ఓదెల భావిస్తున్నారు. అందుకే ప్రేక్షకులకు నేరుగా థియేటర్లలోనే పూర్తి అనుభూతిని అందించాలని ఆయన చూస్తున్నారు.
గతంలో నాగ్ అశ్విన్ దర్శకత్వంలో వచ్చిన మహానటి, విజయ్ దేవరకొండ నటించిన గీతా గోవిందం సినిమాలు ట్రైలర్ లేకుండానే విడుదలై బ్లాక్బస్టర్ విజయాలను అందుకున్నాయి. 2018లో వచ్చిన ఈ రెండు సినిమాలతో పాటు, శ్రీవిష్ణు నటించిన బ్రోచేవారెవరురా కూడా ట్రైలర్ లేకుండానే విజయం సాధించింది. అలాగే రజినీకాంత్ కబాలి, విజయ్ సర్కార్ సినిమాలు కూడా ట్రైలర్ లేకుండానే ప్రేక్షకుల ముందుకు వచ్చాయి.
అయితే, ట్రైలర్ లేకుండా విడుదలైన అన్ని సినిమాలు విజయం సాధించలేదు. మహేష్ బాబు నటించిన ఖలేజా, రవితేజ డిస్కో రాజా సినిమాలకు కూడా ట్రైలర్లు లేవు, కానీ అవి ఆశించిన విజయాన్ని అందుకోలేదు. ఇప్పుడు ప్యారడైజ్ సినిమాకు ఈ సెంటిమెంట్ ఏ మేరకు వర్కవుట్ అవుతుందో వేచి చూడాలి.
