తెలంగాణలో రియల్ ఎస్టేట్ రంగం తీవ్ర సంక్షోభంలో పడింది. ప్రభుత్వం కొత్తగా అమలులోకి తెచ్చిన 22ఏ (22A) నిషేధిత భూముల జాబితా వల్ల భూములు, ఇళ్ల క్రయవిక్రయాలు పడిపోయాయి. రిజిస్ట్రేషన్లు చేయడానికి వీలులేని భూములను ఈ జాబితాలో చేర్చడం వల్ల, ఆ భూములను కొనుగోలు చేయడానికి ప్రజలు వెనుకంజ వేస్తున్నారు.
ఈ ప్రభావం ప్రభుత్వ ఆదాయంపై స్పష్టంగా కనిపిస్తోంది. ఆగస్టు మొదటి వారంలో 22,136 డాక్యుమెంట్లు రిజిస్ట్రేషన్ కాగా, ప్రభుత్వానికి రూ.216.66 కోట్ల ఆదాయం వచ్చింది. అయితే, 22ఏ వివాదం బయటకు రావడంతో రెండో వారంలో డాక్యుమెంట్ల సంఖ్య 16,268కి పడిపోయి, ఆదాయం రూ.173.85 కోట్లకు తగ్గింది. మూడో వారంలో పరిస్థితి మరింత దారుణంగా మారి, కేవలం 12,999 డాక్యుమెంట్లు మాత్రమే రిజిస్టర్ అయ్యాయి. దీంతో ఆదాయం రూ.152.08 కోట్లకు పడిపోయింది.
జూలై నెలలో రిజిస్ట్రేషన్ల ఆదాయం ప్రతి వారం రూ.238 కోట్ల నుంచి రూ.258 కోట్ల మధ్య స్థిరంగా ఉంది. కానీ, ఆగస్టులో 22ఏ నిబంధనల భయంతో కొనుగోలుదారులు తమ నిర్ణయాలను వాయిదా వేసుకుంటున్నారు. తాము కొనే ఆస్తి భవిష్యత్తులో నిషేధిత జాబితాలో ఉంటే ఇబ్బందులు వస్తాయని వారు ఆందోళన చెందుతున్నారు.
ఇప్పటికే కుదుర్చుకున్న ఒప్పందాలను కూడా కొనుగోలుదారులు రద్దు చేసుకుంటున్నారు. దీనివల్ల అమ్మకందారులు, రియల్ ఎస్టేట్ ఏజెంట్లు తీవ్ర ఇబ్బందుల్లో పడ్డారు. కొనుగోలుదారులు తమ డబ్బును తిరిగి ఇవ్వాలని డిమాండ్ చేస్తుండటంతో, అమ్మకందారులు ఆర్థిక సంక్షోభాన్ని ఎదుర్కొంటున్నారు.
ఈ పరిణామాలపై కొనుగోలుదారులు, అమ్మకందారులు, రియల్ ఎస్టేట్ ఏజెంట్లు ప్రభుత్వంపై అసహనం వ్యక్తం చేస్తున్నారు. రియల్ ఎస్టేట్ రంగంపై ఈ నిర్ణయం మరణశాసనంలా మారిందని విమర్శలు వస్తున్నాయి. ఈ నేపథ్యంలో రిజిస్ట్రేషన్ల ఆదాయం పాతాళానికి పడిపోవడంతో రంగం మొత్తం కుదేలైంది.
