ఇటీవల జరిగిన ఎన్నికల్లో టీవీకే పార్టీ తరఫున ఆటో డ్రైవర్లు, కూలీలు, మధ్యతరగతి కుటుంబాల నుంచి చాలామంది తొలిసారి ఎమ్మెల్యేలుగా గెలిచారు. నియోజకవర్గాల్లో ప్రజల సమస్యలను పర్యవేక్షించడం, అధికారులతో సమావేశాలకు రాజధానికి వెళ్లడం వంటి పనులకు వీరికి సొంత వాహనం లేకపోవడం ఇబ్బందిగా మారింది.
ఈ సమస్యను కాటుమన్నార్కోయిల్ ఎమ్మెల్యే జ్యోతిమణి అసెంబ్లీలో ప్రస్తావించారు. అవినీతి రహితంగా ప్రజలకు సేవ చేయాలంటే, క్షేత్రస్థాయిలో తిరిగేందుకు ఎమ్మెల్యేలకు కనీస రవాణా సౌకర్యం కల్పించాలని ఆమె ప్రభుత్వాన్ని కోరారు. దీనిపై స్పీకర్ ప్రభాకర్ స్పందిస్తూ, వాహనాలు లేని ఎమ్మెల్యేల వివరాలను సేకరించి ముఖ్యమంత్రి దృష్టికి తీసుకెళ్తానని హామీ ఇచ్చారు.
ఈ ప్రతిపాదనపై ముఖ్యమంత్రి విజయ్ సానుకూలంగా ఉన్నట్లు పార్టీ వర్గాలు చెబుతున్నాయి. ఆర్థిక ఇబ్బందులున్న ఎమ్మెల్యేలను గుర్తించి, వారికి ప్రభుత్వ వాహనం, వ్యక్తిగత సహాయకుడిని కేటాయించే అవకాశం ఉందని తెలుస్తోంది.
ప్రభుత్వం నుంచి దీనిపై అధికారిక ప్రకటన రావాల్సి ఉంది. ఈ నిర్ణయం అమల్లోకి వస్తే, ప్రజాసేవ కోసం వచ్చిన సామాన్య ఎమ్మెల్యేలకు తమ బాధ్యతలు నిర్వర్తించడం సులభం కానుంది.
