టైప్ 2 డయాబెటిస్ — అంటే శరీరంలో ఇన్సులిన్ సరిగ్గా పనిచేయక రక్తంలో చక్కెర స్థాయిలు పెరిగే సమస్య — ఉన్న మహిళలపై మానవ జన్యుశాస్త్ర పరిశోధకురాలు అనుభా మహాజన్ బృందం ఒక అధ్యయనం నిర్వహించింది. 25 నుంచి 60 ఏళ్ల వయసున్న 96 మంది మహిళలపై 24 వారాల పాటు ఈ పరిశోధన సాగింది. వీరికి ఎటువంటి మందులు ఇవ్వకుండా, కేవలం ఆహారపు అలవాట్లను మార్చడం ద్వారా ఫలితాలను గమనించారు.
ఈ పరిశోధనలో పాల్గొన్న మహిళలకు చికెన్, మటన్, చేపలు, గుడ్లు వంటి మాంసాహారం పూర్తిగా నిలిపివేశారు. వీరికి కేవలం కూరగాయలు, పండ్లు, పప్పులు, పాల ఉత్పత్తులు, తృణధాన్యాలు మరియు పీచు పదార్థాలు ఉన్న ఆహారాన్ని మాత్రమే అందించారు. అంతేకాదు, ఉదయం 9 గంటల నుంచి రాత్రి 7 గంటల మధ్యలోనే భోజనం పూర్తి చేయాలని నిబంధన పెట్టారు.
రాత్రి 7 గంటల నుంచి మరుసటి రోజు ఉదయం 9 గంటల వరకు, అంటే 14 గంటల పాటు వీరికి ఎటువంటి ఆహారం ఇవ్వలేదు. ఈ పద్ధతిని పాటించిన వారిలో రక్తంలో చక్కెర స్థాయిలను సూచించే HbA1c (రక్తంలో సగటు చక్కెర స్థాయిని తెలిపే పరీక్ష) 6.53 శాతానికి తగ్గింది. ఇదే సమయంలో మందుల ద్వారా చికిత్స తీసుకుంటున్న వారిలో ఈ స్థాయి 7.65 శాతంగా ఉండటం గమనార్హం.
ఈ ఆహార నియమాల వల్ల కేవలం చక్కెర స్థాయిలే కాకుండా, బరువు తగ్గడం, BMI (శరీర బరువు, ఎత్తుకు మధ్య నిష్పత్తిని తెలిపే కొలత), భోజనం తర్వాత గ్లూకోజ్ స్థాయిలు, మరియు లిపిడ్ ప్రొఫైల్స్ (రక్తంలోని కొవ్వు స్థాయిలను తెలిపే పరీక్ష) కూడా మెరుగుపడ్డాయని పరిశోధకులు చెబుతున్నారు. గుండె సంబంధిత వ్యాధుల ప్రమాదం కూడా తగ్గిందని వారు గుర్తించారు.
ప్రస్తుతం మన దేశంలో 18 ఏళ్లు పైబడిన వారిలో 7.7 కోట్ల మంది షుగర్తో బాధపడుతుండగా, మరో 2.5 కోట్ల మంది ప్రీ-డయాబెటిస్ (షుగర్ వచ్చే అవకాశం ఉన్న ప్రాథమిక దశ)లో ఉన్నారు. తమకు వ్యాధి ఉన్న విషయం తెలియని వారు కూడా 50 శాతం మంది ఉన్నారని ప్రపంచ ఆరోగ్య సంస్థ (WHO) గణాంకాలు చెబుతున్నాయి. రాత్రిపూట ఉపవాసం, కూరగాయలతో కూడిన ఆహారం తీసుకోవడం ద్వారా టైప్ 2 డయాబెటిస్ ఉన్నవారు తమ జీవక్రియను మెరుగుపర్చుకోవచ్చని ఈ అధ్యయనం సూచిస్తోంది.
