అమెరికా వేదికగా జరిగిన ప్రతిష్టాత్మక గ్రాండ్ చెస్ టూర్ సెయింట్ లూయిస్ రాపిడ్ అండ్ బ్లిట్జ్ టోర్నమెంట్లో 20 ఏళ్ల భారత గ్రాండ్మాస్టర్ ఆర్. ప్రజ్ఞానంద ఛాంపియన్గా అవతరించాడు. గురువారం జరిగిన పెనల్టిమేట్ రౌండ్లో జావోఖిర్ సిందరోవ్తో మ్యాచ్ను డ్రాగా ముగించడంతో, టోర్నీ ముగియడానికి ఒక రౌండ్ ముందే ప్రజ్ఞానంద టైటిల్ను ఖాయం చేసుకున్నాడు.
ఈ టోర్నమెంట్లో ప్రజ్ఞానంద మొత్తం 23.5 పాయింట్లను సాధించి అగ్రస్థానంలో నిలిచాడు. ఉజ్బెకిస్తాన్ ఆటగాడు జావోఖిర్ సిందరోవ్ 22 పాయింట్లతో రెండో స్థానంలో, అమెరికాకు చెందిన వెస్లీ సో 20.5 పాయింట్లతో మూడో స్థానంలో నిలిచారు. రాపిడ్ విభాగంలో స్వల్ప ఆధిక్యం ప్రదర్శించిన ప్రజ్ఞానంద, బ్లిట్జ్ విభాగంలోనూ అద్భుతమైన ఆటతీరుతో 18 పాయింట్లలో 11.5 పాయింట్లను తన ఖాతాలో వేసుకున్నాడు.
ఈ విజయంతో ప్రజ్ఞానంద గ్రాండ్ చెస్ టూర్ ర్యాంకింగ్స్లో రెండో స్థానానికి చేరుకున్నాడు. దీనివల్ల ఈ ఏడాది చివర్లో జరగనున్న గ్రాండ్ ఫినాలేలో అతనికి స్థానం దాదాపు ఖాయమైంది. ఫ్రాన్స్ ఆటగాడు అలిరెజా ఫిరోజ్జా టూర్ నుండి వైదొలగడం కూడా ప్రజ్ఞానందకు కలిసివచ్చింది.
ఆదివారం నుండి ప్రారంభం కానున్న క్లాసికల్ ఈవెంట్లో ప్రజ్ఞానంద తన ఫామ్ను కొనసాగించాల్సి ఉంది. ఈ టోర్నమెంట్లో టాప్ మూడు స్థానాల్లో నిలిస్తే, జూన్లో నార్వే చెస్ టైటిల్ గెలిచిన ప్రజ్ఞానందకు ఇది మరో కీలక మైలురాయిగా నిలుస్తుంది.
