సికింద్రాబాద్‌లోని మద్రాస్ రెజిమెంట్ నుంచి ఆయుధాలు, మందుగుండు సామగ్రిని దొంగిలించిన కేసులో ప్రధాన నిందితుడు మల్లేషాను పోలీసులు పది రోజుల కస్టడీలో విచారించారు. 2009లో సైన్యంలో చేరిన మల్లేషాకు ఆయుధాల నిర్వహణపై ప్రత్యేక శిక్షణ ఉంది. గతంలో పలు కంటోన్మెంట్లలో ఆయుధాగారాల బాధ్యతలను చూసిన ఇతనిపై, విధుల్లో నిర్లక్ష్యంగా వ్యవహరించినందుకు గతంలో క్రమశిక్షణ చర్యలు తీసుకున్నట్లు పోలీసులు తెలిపారు.
ఆర్థిక ఇబ్బందుల కారణంగా 2025లో ఆయుధాల దొంగతనానికి మల్లేషా ప్రణాళికలు సిద్ధం చేశాడు. బ్యాంకు, నగల దుకాణాల దోపిడీల గురించి చూపించే వెబ్ సిరీస్‌లు, వీడియోలు తనను ప్రభావితం చేశాయని నిందితుడు వెల్లడించాడు. 2026 జూలైలో మద్రాస్ రెజిమెంట్ ప్రాంగణంలో మల్లేషా పదేపదే నిఘా పెట్టాడు.
దొంగతనానికి ముందు శేషు, ప్రవీణ్, వినోద్‌లతో కలిసి మల్లేషా అక్కడ సీసీటీవీ కెమెరాలు, లైటింగ్ ఏర్పాట్లు, సైనికుల కదలికలను క్షుణ్ణంగా అధ్యయనం చేశాడు. చోరీ చేసిన ఆయుధాలను స్కూటర్, కారులో తరలించి నాగర్ కర్నూల్ జిల్లాలోని తన ఇంట్లో దాచిపెట్టాడు. 2007లో అమ్రాబాద్, అచ్చంపేట ప్రాంతాల్లో జరిగిన ఇళ్ల దొంగతనాల కేసుల్లో కూడా మల్లేషాకు ప్రమేయం ఉన్నట్లు పోలీసులు గుర్తించారు.
అక్రమ ఆయుధాల వ్యాపారంలో భాగంగా 2022లో కోల్‌కతాలోని బరాక్‌పూర్‌కు చెందిన డీలర్ అవల్ డే అలియాస్ ఓబీతో మల్లేషాకు పరిచయం ఏర్పడింది. ఈ పరిచయం బీర్బల్ షా అనే వ్యక్తి ద్వారా జరిగిందని పోలీసులు తేల్చారు. గతంలోనే అవల్ డే నుంచి 10,000 రూపాయలకు ఒక తుపాకీని మల్లేషా కొనుగోలు చేసినట్లు ఆరోపణలు ఉన్నాయి.
దొంగిలించిన ఆయుధాలను కోల్‌కతాకు చెందిన బీర్బల్ షా ద్వారా అవల్ డేకు విక్రయించాలని మల్లేషా పథకం వేశాడు. ఈ నెట్‌వర్క్‌పై పోలీసులు విస్తృత దర్యాప్తు చేస్తున్నారు. నిందితుడి నుంచి సేకరించిన వివరాల ఆధారంగా తదుపరి చర్యలు తీసుకుంటామని పోలీసులు పేర్కొన్నారు.
