తెలంగాణ పర్యాటక రంగాన్ని అంతర్జాతీయ ప్రమాణాలతో తీర్చిదిద్దేందుకు రాష్ట్ర ప్రభుత్వం కొత్త వ్యూహాలను అమలు చేస్తోంది. ఇందులో భాగంగా హైదరాబాద్ శివార్లలోని రంగారెడ్డి, వికారాబాద్ జిల్లాల్లో వైన్ టూరిజం ప్రాజెక్టులను అభివృద్ధి చేయాలని మంత్రి జూపల్లి కృష్ణారావు నిర్ణయించారు.
ఈ ప్రాజెక్టుల రూపకల్పన కోసం మంత్రి జూపల్లి అమెరికాలోని వర్జీనియాలో పర్యటించారు. అక్కడ స్టోన్ టవర్ వైనరీతో పాటు అష్బర్న్లోని వైనరీలను ఆయన సందర్శించారు. ద్రాక్ష సాగు, ఫెర్మెంటేషన్, ప్రాసెసింగ్, బాట్లింగ్ మరియు గ్లోబల్ మార్కెటింగ్ పద్ధతులపై అక్కడి నిపుణులతో ఆయన చర్చలు జరిపారు. ఈ పర్యటనలో ప్రభుత్వ విప్ యెన్నం శ్రీనివాస్ రెడ్డి, ఎమ్మెల్యే బుయ్యని మనోహర్ రెడ్డి కూడా పాల్గొన్నారు.
వైన్ టూరిజం ద్వారా పర్యాటకులకు కొత్త అనుభూతిని అందించడంతో పాటు స్థానిక ద్రాక్ష రైతులకు మేలు జరుగుతుందని మంత్రి పేర్కొన్నారు. ఈ నమూనాల వల్ల గ్రామీణ ఆర్థిక వ్యవస్థ పుంజుకోవడమే కాకుండా, యువతకు ఉపాధి అవకాశాలు లభిస్తాయని ఆయన వివరించారు. ఇటీవల జరిగిన తెలంగాణ టూరిజం కాన్క్లేవ్లో రూ. 15 వేల కోట్ల పెట్టుబడుల ప్రతిపాదనలు రాగా, అందులో వైనరీ వాక్త్రూతో కూడిన వైన్యర్డ్ రిసార్ట్ ప్రాజెక్టు ప్రత్యేక ఆకర్షణగా నిలిచింది.
హైదరాబాద్ వాతావరణం, శివారు జిల్లాల్లోని భూములు ద్రాక్ష సాగుకు అనుకూలంగా ఉన్నాయని మంత్రి జూపల్లి తెలిపారు. ఈ అనుకూలతలను పరిగణనలోకి తీసుకుని, త్వరలోనే సమగ్ర ప్రణాళికతో ఈ ప్రాజెక్టులను ముందుకు తీసుకెళ్తామని ఆయన స్పష్టం చేశారు.
