జింబాబ్వేతో జరిగిన మొదటి టీ20 మ్యాచ్లో లెగ్ స్పిన్నర్ రవి బిష్ణోయ్ తన లయను తిరిగి అందుకున్నారు. నాలుగు ఓవర్లు వేసిన బిష్ణోయ్ కేవలం 24 పరుగులు మాత్రమే ఇచ్చి ఒక వికెట్ పడగొట్టారు. గతంలో ఇంగ్లాండ్తో జరిగిన మ్యాచ్లో నాలుగు ఓవర్లలో 60 పరుగులు ఇచ్చి వికెట్ లేక ఇబ్బంది పడిన బిష్ణోయ్, ఈసారి మెరుగైన ప్రదర్శనతో ఆకట్టుకున్నారు.
బిష్ణోయ్ బౌలింగ్ యాక్షన్లో ఎలాంటి మార్పులు చేయలేదని, కేవలం రన్-అప్లో చిన్న మార్పు చేశారని బౌలింగ్ కోచ్ సునీల్ జోషి వెల్లడించారు. రిటర్న్ క్రీజ్కు మరీ దగ్గరగా వెళ్లకుండా బౌలింగ్ చేయడం వల్ల అతనికి మంచి ఫలితం దక్కిందని జోషి వివరించారు.
భారత జట్టులోని ఇతర యువ ఆటగాళ్లపై కూడా జోషి ప్రశంసలు కురిపించారు. హార్దిక్ పాండ్యా, శివమ్ దూబే తరహాలోనే సూర్యాంశ్ షెడ్గే జట్టులో స్థిరపడే సత్తా ఉన్న ఆటగాడని, అతనికి కొంత సమయం ఇవ్వాలని ఆయన అభిప్రాయపడ్డారు. గాయం నుంచి కోలుకున్న మయాంక్ యాదవ్, అశోక్ శర్మల బౌలింగ్ భారత వేగవంతమైన బౌలింగ్ విభాగాన్ని మరింత బలోపేతం చేసిందని పేర్కొన్నారు.
అభిషేక్ శర్మ బౌలింగ్లో పురోగతి సాధించాడని, తిలక్ వర్మ కూడా మంచి ప్రత్యామ్నాయ బౌలర్గా ఉపయోగపడతాడని జోషి తెలిపారు. మరోవైపు వైభవ్ సూర్యవంశీ విషయంలో మాత్రం ప్రస్తుతానికి అతని బ్యాటింగ్పైనే దృష్టి పెడతామని, సరైన సమయం వచ్చినప్పుడు నిపుణుల పర్యవేక్షణలో బౌలింగ్ నైపుణ్యాలపై పని చేస్తామని ఆయన స్పష్టం చేశారు.
