భారతదేశంలో ఏటా రూ. 3.3 లక్షల కోట్లకు పైగా వ్యాపారం జరిగే మద్యం మార్కెట్లో, ప్రముఖ కంపెనీలు కృత్రిమ రసాయనాలను వాడుతున్నట్లు భారత ఆహార భద్రత మరియు ప్రమాణాల సంస్థ (FSSAI) తనిఖీల్లో వెల్లడైంది. విస్కీ, రమ్ తయారీలో సహజ సిద్ధమైన ప్రక్రియను పాటించకుండా, సమయాన్ని ఆదా చేసేందుకు కంపెనీలు ‘విస్కీ ఫ్లేవర్’, ‘రమ్ ఫ్లేవర్’ పేరుతో ప్రమాదకరమైన రసాయనాలను కలుపుతున్నాయని సంస్థ గుర్తించింది.
ఈ ఉల్లంఘనల కారణంగా రాయల్ ఛాలెంజ్, ఆంటిక్విటీ బ్లూ, మెక్డోవెల్స్ నంబర్ 1, బ్యాగ్పైపర్, ఓల్డ్ కాస్క్ డీలక్స్ XXX రమ్ మరియు ఓల్డ్ మాంక్ బ్రాండ్లకు చెందిన పలు ఉత్పత్తుల విక్రయాలను ఎఫ్ఎస్ఎస్ఏఐ నిలిపివేసింది. అంతర్జాతీయంగా ఆమోదయోగ్యమైన ఏ తయారీ విధానంలోనూ రమ్కు రమ్ ఫ్లేవర్ లేదా విస్కీకి విస్కీ ఫ్లేవర్ జోడించే ఆచారం లేదని, ఇది పూర్తిగా నిబంధనలకు విరుద్ధమని అధికారులు స్పష్టం చేశారు.
ఈ ఆరోపణలపై యునైటెడ్ స్పిరిట్స్ లిమిటెడ్ స్పందిస్తూ, తమ ఉత్పత్తుల లేబుళ్లపై ఉన్న సమాచారం ప్రస్తుత చట్టపరమైన నిబంధనలకు అనుగుణంగానే ఉందని పేర్కొంది. ఇది పరిశ్రమలో చాలా కాలంగా కొనసాగుతున్న ప్రామాణిక పద్ధతి అని కంపెనీ వాదిస్తోంది.
