రాష్ట్రంలోని అన్ని ప్రైవేట్ మరియు అన్ఎయిడెడ్ పాఠశాలలు విద్యార్థుల నుంచి వసూలు చేసే ఫీజుల వివరాలను నోటీసు బోర్డులపై ప్రదర్శించాలని విద్యాశాఖ స్పష్టం చేసింది. పాఠశాల అధికారిక వెబ్సైట్తో పాటు, విద్యాశాఖ పోర్టల్లో కూడా ఈ సమాచారాన్ని నమోదు చేయాలని ఆదేశాల్లో పేర్కొంది. 2026-27 విద్యా సంవత్సరానికి సంబంధించిన ఫీజు నిర్మాణాన్ని పారదర్శకంగా ఉంచడం ద్వారా తల్లిదండ్రులకు స్పష్టత కల్పించాలని ప్రభుత్వం భావిస్తోంది.
అధిక ఫీజుల వసూళ్లను నియంత్రించే ఉద్దేశంతో ఈ నిర్ణయం తీసుకున్నట్లు అధికారులు తెలిపారు. పాఠశాలలు నిర్ణయించిన ఫీజులు, ఇతర ఛార్జీల వివరాలు అందరికీ అందుబాటులో ఉండాలని ప్రభుత్వం సూచించింది. అడ్మిషన్ల ప్రక్రియ ప్రారంభానికి ముందే ఈ ఆదేశాలు రావడంతో, ప్రైవేట్ పాఠశాలల వ్యవహారాలపై పర్యవేక్షణ మరింత పెరగనుంది.
నిబంధనలను పాటించని పాఠశాలలపై కఠిన చర్యలు తీసుకోవాలని జిల్లా విద్యాశాఖ అధికారులకు ప్రభుత్వం ఆదేశాలు జారీ చేసింది. ముందుగా నిబంధనలు ఉల్లంఘించిన పాఠశాలలకు షోకాజ్ నోటీసులు పంపాలని, వారి వివరణ సంతృప్తికరంగా లేని పక్షంలో చట్టప్రకారం చర్యలు తీసుకోవాలని స్పష్టం చేసింది.
