రాష్ట్రంలో 7,437 పోలీస్ ఉద్యోగాల భర్తీ ప్రక్రియను అత్యంత పారదర్శకంగా, ఎటువంటి లోపాలకు తావులేకుండా నిర్వహించాలని ముఖ్యమంత్రి రేవంత్ రెడ్డి అధికారులకు స్పష్టం చేశారు. ఈ నియామక ప్రక్రియకు ఆటంకం కలిగించేందుకు కొన్ని రాజకీయ పార్టీలు, ఇతర శక్తులు ప్రయత్నిస్తున్నట్లు నిఘా వర్గాలు అందించిన సమాచారం నేపథ్యంలో ఆయన డీజీపీ సీవీ ఆనంద్ మరియు ఇతర ఉన్నతాధికారులతో అత్యవసర సమావేశం నిర్వహించారు.
పరీక్షా పత్రాల తయారీ, ముద్రణ, రవాణా వంటి కీలక దశల్లో అధికారులు అప్రమత్తంగా ఉండాలని సీఎం ఆదేశించారు. పరీక్షా కేంద్రాల భద్రతపై ప్రత్యేక దృష్టి సారించాలని, ముఖ్యంగా కోచింగ్ సెంటర్ల కార్యకలాపాలపై నిఘా ఉంచాలని సూచించారు. సోషల్ మీడియాలో నియామక పరీక్షలపై తప్పుడు ప్రచారాలు జరగకుండా చూడాలని ఆయన స్పష్టం చేశారు.
ఉద్యోగాల పేరుతో అభ్యర్థులను మోసం చేసే దళారులు, నకిలీ వెబ్సైట్లు, సోషల్ మీడియా ఖాతాలపై సైబర్ క్రైమ్ విభాగం ద్వారా కఠిన చర్యలు తీసుకోవాలని సీఎం ఆదేశించారు. పరీక్షలు పూర్తయ్యే వరకు సైబర్ సెక్యూరిటీ, ఇంటెలిజెన్స్ విభాగాలు నిరంతరం అప్రమత్తంగా ఉండాలని ఆయన సూచించారు.
ఈ అత్యవసర సమావేశంలో సీఎం ప్రిన్సిపల్ సెక్రటరీ వి.శేషాద్రి, డీజీపీ సీవీ ఆనంద్, హోంశాఖ ప్రిన్సిపల్ సెక్రటరీ శిఖా గోయల్, పోలీస్ రిక్రూట్మెంట్ బోర్డు చైర్మన్ వి.వి.శ్రీనివాస రావు, హైదరాబాద్ సిటీ పోలీస్ కమిషనర్ సజ్జనార్ పాల్గొన్నారు. నియామక ప్రక్రియ ముగిసే వరకు అధికారులు ఇదే అప్రమత్తతతో వ్యవహరించాలని సీఎం ఆదేశించారు.
