తెలుగు, తమిళం, హిందీ భాషల్లో ఎన్నో సూపర్ హిట్ చిత్రాల్లో నటించిన భూమిక, ఒకప్పుడు టాలీవుడ్లో స్టార్ హీరోయిన్గా ఓ వెలుగు వెలిగింది. పవర్ స్టార్ పవన్ కళ్యాణ్, సూపర్ స్టార్ మహేష్ బాబు, జూనియర్ ఎన్టీఆర్ వంటి అగ్ర హీరోలకు వరుసగా విజయాలను అందించడంతో ఆమెను లక్కీ హీరోయిన్ లేదా గోల్డెన్ లెగ్ అని పిలిచేవారు.
మోడలింగ్ రంగం ద్వారా కెరీర్ మొదలుపెట్టిన భూమిక, పలు ప్రకటనల్లో నటించిన తర్వాత వెండితెరపైకి వచ్చింది. అక్కినేని సుమంత్ హీరోగా నటించిన 'యువకుడు' సినిమాతో ఆమె తెలుగు తెరకు కథానాయికగా పరిచయమైంది. మొదటి సినిమాతోనే నటిగా అందరి దృష్టిని ఆకర్షించగలిగింది.
ఆ తర్వాత పవన్ కళ్యాణ్ సరసన నటించిన 'ఖుషి' సినిమా ఆమె కెరీర్ను పూర్తిగా మార్చేసింది. ఈ చిత్రం ఆమెకు స్టార్ డమ్ను తెచ్చిపెట్టింది. ఆ వెంటనే మహేష్ బాబుతో 'ఒక్కడు', ఎన్టీఆర్తో 'సింహాద్రి' వంటి వరుస బ్లాక్ బస్టర్ చిత్రాల్లో నటించి తన స్థానాన్ని సుస్థిరం చేసుకుంది.
కేవలం కమర్షియల్ సినిమాలే కాకుండా, 'వాసు', 'మిస్సమ్మ', 'అనసూయ' వంటి చిత్రాలతో విమర్శకుల ప్రశంసలు కూడా అందుకుంది. తెలుగుతో పాటు తమిళం, మలయాళం, హిందీ భాషల్లోనూ ఆమె నటించింది. ముఖ్యంగా హిందీలో సల్మాన్ ఖాన్ సరసన నటించిన 'తేరే నామ్' చిత్రం భారీ విజయాన్ని సాధించింది.
ఒకప్పుడు స్టార్ హీరోయిన్గా రాణించిన భూమిక, ఇప్పుడు సెకండ్ ఇన్నింగ్స్లో నటిగా కొనసాగుతోంది. ప్రస్తుతం ఆమె అక్క, వదిన వంటి పాత్రల్లో నటిస్తూ ప్రేక్షకులను అలరిస్తోంది.
