ఆగస్టు 26న నేపాల్-టిబెట్ సరిహద్దులోని రసువా ప్రాంతంలో హిమానీ నదం విరిగిపడటంతో భారీ వరదలు సంభవించాయి. మంచు, రాళ్లు, బురదతో కూడిన ఉధృత ప్రవాహం భోటే కోషి, త్రిశూలి నదుల ద్వారా దిగువ ప్రాంతాలకు దూసుకురావడంతో రసువా, నువాకోట్, ధాడింగ్ జిల్లాల్లోని గ్రామాలు, మార్కెట్లు బురద దిబ్బలుగా మారాయి. అమెరికా జియాలాజికల్ సర్వే (భూగర్భ శాస్త్ర పరిశోధనా సంస్థ) విశ్లేషణ ప్రకారం, ఇది భూకంపం వల్ల సంభవించింది కాదు, కేవలం హిమానీ నదం కూలిపోవడం వల్లే జరిగిందని స్పష్టమైంది.
ఈ విపత్తులో మరణించిన వారి సంఖ్య పెరుగుతోంది. గల్లంతైన వారిలో 100 నుండి 140 మంది భారతీయులతో పాటు అమెరికా, బ్రిటన్, ఆస్ట్రేలియా, మలేషియా దేశాలకు చెందిన పర్యాటకులు కూడా ఉన్నట్లు అధికారులు తెలిపారు. రహదారులు, వంతెనలు దెబ్బతినడం, కమ్యూనికేషన్ వ్యవస్థలు నిలిచిపోవడంతో సహాయక చర్యలకు తీవ్ర ఆటంకాలు ఎదురవుతున్నాయి. నేపాల్ సైన్యం హెలికాప్టర్ల ద్వారా శిథిలాల మధ్య చిక్కుకున్న వారిని సురక్షిత ప్రాంతాలకు తరలిస్తోంది.
భారతదేశంలోని బీహార్, ఉత్తరప్రదేశ్ రాష్ట్రాల్లోని సరిహద్దు ప్రాంతాలపై ఈ వరద ప్రభావం ఉండే అవకాశం ఉండటంతో కేంద్ర హోంశాఖ అప్రమత్తమైంది. ఎగువ ప్రాంతాల్లో నీటిమట్టం పెరిగితే సరిహద్దుకు ఇటువైపు కూడా ప్రభావం ఉంటుందని భావిస్తూ, రాష్ట్ర ప్రభుత్వాలతో సమన్వయం చేసుకుంటోంది. నేపాల్లో చిక్కుకున్న భారతీయ పౌరుల వివరాలను సేకరించి, వారిని సురక్షితంగా తరలించేందుకు భారత్ ప్రయత్నిస్తోంది.
నిపుణుల అభిప్రాయం ప్రకారం, ఈ విపత్తు ఇక్కడితో ముగిసే అవకాశం లేదు. నదుల్లో పేరుకుపోయిన శిథిలాలు, బురద వల్ల సహజ ఆనకట్టలు ఏర్పడి, అవి బలహీనపడితే వర్షం లేకపోయినా మళ్లీ ఆకస్మిక వరదలు వచ్చే ప్రమాదం ఉంది. పెరుగుతున్న ఉష్ణోగ్రతల వల్ల హిమాలయ ప్రాంతం అస్థిరంగా మారుతోందని, ఇది భారత్, నేపాల్, టిబెట్, చైనాలకు ప్రమాద సంకేతమని హెచ్చరికలు వస్తున్నాయి.
ప్రస్తుతం వాతావరణ శాఖ సూచనల మేరకు, పశ్చిమ హిమాలయాలు, ఉత్తరాఖండ్, హిమాచల్ ప్రదేశ్, ఈశాన్య భారతదేశంలో భారీ వర్షాలు కురిసే అవకాశం ఉంది. పర్వత ప్రాంతాల్లోని వాలులు ఇప్పటికే తడిగా, బలహీనంగా ఉండటంతో అదనపు ముప్పు పొంచి ఉంది. గల్లంతైన వారి కోసం గాలింపు చర్యలు కొనసాగుతుండగా, భవిష్యత్తులో ఇలాంటి మెరుపు వరదలను ఎదుర్కోవడానికి కచ్చితమైన అధ్యయనం అవసరమని నిపుణులు సూచిస్తున్నారు.
