దేశవ్యాప్తంగా నకిలీ ఉత్పత్తుల ప్రభావంపై అస్పాక్రిసిల్ 2025 నివేదికను సోమవారం హైదరాబాద్లో విడుదల చేశారు. ఈ అధ్యయనం కోసం 9 నగరాల్లో 1,639 మంది వినియోగదారుల నుంచి సమాచారాన్ని సేకరించారు. ఇందులో 89% మంది తమ జీవితంలో ఎప్పుడో ఒకప్పుడు నకిలీ వస్తువులను కొనుగోలు చేసినట్లు అంగీకరించారు.
గత 12 నెలల కాలంలో 35% మంది నకిలీ వస్తువుల ముప్పును ఎదుర్కొన్నారు. ఇందులో హైదరాబాద్ నగరంలో అత్యధికంగా 46% మంది నకిలీ ఉత్పత్తుల బారిన పడటం ఆందోళన కలిగిస్తోంది. నకిలీ వస్తువుల వ్యాప్తి దుస్తులలో 34%, ఎలక్ట్రానిక్స్లో 31%, ఆరోగ్య ఉత్పత్తులలో 28%, ఎఫ్ఎమ్సిజి (నిత్యం వాడే సబ్బులు, షాంపూలు వంటి వినియోగ వస్తువులు)లో 25%, అగ్రో (వ్యవసాయ ఉత్పత్తులు)లో 23%, ఆటో పార్ట్లలో 22% పెరిగింది.
చాలామంది వినియోగదారులు వస్తువులను కొనేటప్పుడు జాగ్రత్తలు తీసుకుంటున్నామని చెబుతున్నా, క్షేత్రస్థాయిలో పరిస్థితి భిన్నంగా ఉంది. 62% మంది వస్తువు అసలైనదా కాదా అని చూస్తున్నామని చెబుతున్నప్పటికీ, కేవలం ప్యాకేజింగ్ చూసి మోసపోతున్నారని అస్పా అధ్యక్షుడు అంకిత్ గుప్తా తెలిపారు. వస్తువుల పైన ఉండే క్యూఆర్ కోడ్లు (డిజిటల్ సమాచారం కోసం స్కాన్ చేసే చతురస్రాకార గుర్తులు) 23% మంది, హోలోగ్రామ్లు (నకిలీలను గుర్తించే ప్రత్యేక భద్రతా ముద్రలు) 34% మంది మాత్రమే పరిశీలిస్తున్నారని నివేదిక పేర్కొంది.
ఈ సమస్యను పరిష్కరించడానికి బ్రాండ్లు, ప్రభుత్వాలు, వినియోగదారులు కలిసి పనిచేసే త్రిశూల్ విధానం అవసరమని అంకిత్ గుప్తా సూచించారు. వస్తువులను ట్రాక్-అండ్-ట్రేస్ (వస్తువు తయారీ నుంచి వినియోగదారుడికి చేరే వరకు ప్రతి దశను పర్యవేక్షించే సాంకేతికత) చేయడం ద్వారా నకిలీలను అరికట్టవచ్చని అస్పా ఉపాధ్యక్షుడు నకుల్ పస్రీచా వివరించారు.
నకిలీ ఉత్పత్తుల వల్ల వినియోగదారుడు, వ్యాపారి, దేశం ముగ్గురూ నష్టపోతారని అంతర్జాతీయ వినియోగదారుల విధాన నిపుణులు ప్రొఫెసర్ బెజోన్ కుమార్ మిశ్రా స్పష్టం చేశారు. ఈ నకిలీల వల్ల ఆర్థికంగా, ఆరోగ్యపరంగా తీవ్ర ప్రభావం ఉంటుందని నివేదిక హెచ్చరిస్తోంది.
