కాపు ఉద్యమ నేత ముద్రగడ పద్మనాభం సొంతూరు కిర్లంపూడిలో గత వారం ఆయన సంతాప సభ జరిగింది. ఈ కార్యక్రమాన్ని అనుచరులు, అభిమానుల పేరుతో నిర్వహించినప్పటికీ, దీని వెనుక వైసీపీ నేతల పాత్ర ఉందనే అభిప్రాయం వ్యక్తమవుతోంది. సభలో భాగంగా గతంలో కాపు రిజర్వేషన్ల కోసం ముద్రగడ చేసిన ఉద్యమ సమయంలో చిరంజీవి, దాసరి నారాయణరావు మాట్లాడిన వీడియోలను ప్రదర్శించడం ఇప్పుడు చర్చనీయాంశమైంది.
గత టీడీపీ ప్రభుత్వ హయాంలో ముద్రగడ దీక్ష చేపట్టినప్పుడు, చిరంజీవి ప్రభుత్వ తీరును తప్పుబడుతూ కాపు రిజర్వేషన్లపై హామీని ఎందుకు అమలు చేయడం లేదని ప్రశ్నించారు. ఆ సమయంలో చిరంజీవి రాజకీయంగా యాక్టివ్గా ఉండి ఆ వ్యాఖ్యలు చేశారు. ఇప్పుడు ముద్రగడ మరణానంతరం, ఆయన సంతాప సభలో ఆ పాత వీడియోలను ప్లే చేయడం ద్వారా కూటమి ప్రభుత్వాన్ని, ముఖ్యంగా జనసేనను డిఫెన్స్లో పడేసే ప్రయత్నం జరిగిందని విశ్లేషకులు భావిస్తున్నారు.
ప్రస్తుత ప్రభుత్వంలో జనసేన భాగస్వామిగా ఉన్నందున, పాత వీడియోల ద్వారా డిప్యూటీ సీఎంను ఇరుకున పెట్టడం, కాపు సామాజికవర్గంలో మైలేజ్ పొందడం అనే రెండు లక్ష్యాలతో వైసీపీ ఈ ప్లాన్ చేసి ఉండవచ్చని రాజకీయ వర్గాల్లో చర్చ జరుగుతోంది. ముద్రగడ వైసీపీలో చేరడం, ఆయన రాజకీయ రీ ఎంట్రీ తర్వాత చిరంజీవి ఎటువంటి సంతాప ప్రకటన చేయకపోవడం వంటి పరిణామాల నేపథ్యంలో ఈ వీడియోల ప్రదర్శన ప్రాధాన్యత సంతరించుకుంది.
అయితే, ఈ వీడియోల ప్రదర్శనపై జనసేన నుంచి గానీ, మెగా అభిమానుల నుంచి గానీ ఇప్పటివరకు ఎటువంటి స్పందన రాలేదు. చిన్నపాటి రిప్లై ఇచ్చినా అది మరింత హైప్ అవుతుందనే ఉద్దేశంతోనే వారు అప్రమత్తంగా వ్యవహరిస్తున్నట్లు సమాచారం. ఈ పరిణామాలపై భవిష్యత్తులో రాజకీయ స్పందనలు ఎలా ఉంటాయో వేచి చూడాలి.
