మహిళల ఆసియా కప్-2026 కోసం అమితా శర్మ నేతృత్వంలోని ఎంపిక కమిటీ 15 మంది సభ్యుల జట్టును ఎంపిక చేసింది. టీ20 ప్రపంచకప్లో జట్టు సెమీఫైనల్ చేరలేకపోయినప్పటికీ, సెలెక్టర్లు హర్మన్ప్రీత్ కౌర్ను కెప్టెన్గా, స్మృతి మందానను ఉప కెప్టెన్గా కొనసాగిస్తూ స్థిరత్వానికి ప్రాధాన్యం ఇచ్చారు.
ప్రధాన జట్టులో హర్మన్ప్రీత్ కౌర్, స్మృతి మందాన, షెఫాలీ వర్మ, జెమీమా రోడ్రిగ్స్, భారతి ఫుల్మాలి, దీప్తి శర్మ, రిచా ఘోష్, జి. కమలిని, అరుంధతి రెడ్డి, ప్రేమా రావత్, రాధా యాదవ్, శ్రీ చరణి, రేణుకా ఠాకూర్, నందిని శర్మ, క్రాంతి గౌడ్ ఉన్నారు. గాయపడిన శ్రేయాంక పాటిల్ స్థానంలో ప్రపంచకప్ సమయంలో జట్టులోకి వచ్చిన ప్రేమా రావత్ తన స్థానాన్ని నిలబెట్టుకుంది.
ఈసారి జట్టులో ముగ్గురు వికెట్ కీపర్లకు చోటు దక్కింది. రిచా ఘోష్, జి. కమలిని ప్రధాన జట్టులో ఉండగా, ఉమా చేత్రీని రిజర్వ్ జాబితాలో ఉంచారు. గతంలో ఓపెనర్గా ఆడిన ప్రతీకా రావల్ ఈసారి ప్రధాన జట్టులో చోటు కోల్పోయి, రిజర్వ్ ఆటగాళ్ల జాబితాకు పరిమితమైంది. ప్రతీకా రావల్తో పాటు ఉమా చేత్రీ, వైష్ణవి శర్మ, సాయలి సత్ఘరే, మిన్ను మణి రిజర్వ్ ఆటగాళ్లుగా ఎంపికయ్యారు.
మహిళల ఆసియా కప్ చరిత్రలో భారత్ ఏడుసార్లు విజేతగా నిలిచింది. గత టోర్నీ ఫైనల్లో శ్రీలంక చేతిలో ఓటమి పాలైన భారత్, ఈసారి ట్రోఫీని తిరిగి దక్కించుకోవాలనే లక్ష్యంతో ఉంది. ఆసియా క్రికెట్ కౌన్సిల్ ఇంకా పూర్తి షెడ్యూల్ను ప్రకటించాల్సి ఉన్నప్పటికీ, హర్మన్ప్రీత్ సేన ఇప్పటికే సిద్ధమైంది.
