రాష్ట్రంలోని అన్ని ఎంపీడీవో కార్యాలయాల్లో ఆగస్టు 17 నుంచి 'ప్రజావాణి' కార్యక్రమాన్ని ప్రభుత్వం ప్రారంభిస్తోంది. ప్రతి సోమవారం నిర్వహించే ఈ కార్యక్రమంలో ప్రజలు తమ సమస్యలను నేరుగా అధికారులకు చెప్పుకోవచ్చు. త్వరలో ఆన్లైన్ పోర్టల్ను కూడా అందుబాటులోకి తెస్తామని, దీని ద్వారా ప్రజలు ఎక్కడి నుంచైనా అర్జీలు పంపవచ్చని మంత్రి తెలిపారు. ఈ ఫిర్యాదుల పురోగతిని ప్రత్యేక డ్యాష్బోర్డ్ ద్వారా పర్యవేక్షిస్తామని ఆయన చెప్పారు.
కృష్ణా, గోదావరి నదీ జలాల వాటా విషయంలో ప్రభుత్వం రాజీ పడదని మంత్రి స్పష్టం చేశారు. పెండింగ్ ప్రాజెక్టులను పూర్తి చేసి రైతులకు సాగునీరు అందిస్తామని, ముఖ్యంగా పాలమూరు ప్రాజెక్టును త్వరలోనే పూర్తి చేస్తామని ఆయన హామీ ఇచ్చారు. ధాన్యం ఉత్పత్తిలో తెలంగాణ రికార్డులు సృష్టించిందని, రైతు భరోసా, రుణమాఫీ వంటి పథకాలతో రైతులకు అండగా నిలుస్తున్నారని ఆయన పేర్కొన్నారు.
హైదరాబాద్లో మూసీ నదిని ప్రక్షాళన చేసేందుకు ప్రభుత్వం ప్రణాళికలు సిద్ధం చేసింది. నదిలోకి మురుగునీరు చేరకుండా 39 కొత్త సీవరేజ్ ట్రీట్మెంట్ ప్లాంట్లు (మురుగునీటి శుద్ధి కేంద్రాలు) నిర్మిస్తున్నామని, గోదావరి నుంచి 2.55 టీఎంసీల నీటిని మూసీలోకి తరలిస్తామని మంత్రి వివరించారు.
రాష్ట్రంలో మౌలిక వసతుల కల్పన కోసం హైదరాబాద్ చుట్టూ 360 కిలోమీటర్ల రీజినల్ రింగ్ రోడ్డు, 6,092 కిలోమీటర్ల మేర రోడ్ల అభివృద్ధికి చర్యలు తీసుకుంటున్నామని మంత్రి తెలిపారు. వరంగల్ మామునూరు విమానాశ్రయం పునరుద్ధరణ, ఆదిలాబాద్లో జాయింట్ యూజ్ ఎయిర్ఫీల్డ్ అభివృద్ధి పనులు చేపడుతున్నట్లు ఆయన వెల్లడించారు. హైదరాబాద్ మెట్రోను 123 కిలోమీటర్ల మేర విస్తరించేందుకు ప్రణాళికలు రూపొందించినట్లు ఆయన చెప్పారు.
