మంగళవారం ఆగస్టు 4న మందమర్రి బీ1 కార్యాలయంలో నిర్వహించిన ప్రెస్ మీట్లో మంత్రి వివేక్ వెంకటస్వామి మాట్లాడారు. కేసీఆర్ హయాంలో కొత్త గనులు ప్రారంభం కాకపోవడం, ఉద్యోగాల కల్పన లేకపోవడంతో సింగరేణిలో కార్మికుల సంఖ్య తగ్గిందని ఆయన ఆరోపించారు. బొగ్గు నిక్షేపాలు ఉన్న ప్రాంతాల్లో కొత్త గనులను ఏర్పాటు చేసి, సంస్థకు పూర్వ వైభవం తెచ్చేందుకు సీఎం రేవంత్ ప్రభుత్వం ప్రయత్నిస్తోందని ఆయన తెలిపారు.
కాంగ్రెస్ ప్రభుత్వం అధికారంలోకి వచ్చాక మణుగూరు, తాడిచర్ల-2, ఆర్కే ఓపెన్ కాస్ట్ గనులను అందుబాటులోకి తెచ్చామని మంత్రి వివరించారు. గత బీఆర్ఎస్ ప్రభుత్వం రూ. లక్ష కోట్ల ప్రాజెక్టుల పేరుతో 70 టీఎంసీల నీటిని 100 మీటర్ల ఎత్తుకు పంపింగ్ చేసి, భారీగా కరెంట్ బిల్లులు చెల్లించిందని ఆయన విమర్శించారు. అధికారం కోల్పోయిన తర్వాత కేటీఆర్ ఫ్రస్టేషన్లో ఇష్టం వచ్చినట్లు మాట్లాడుతున్నారని ఆయన మండిపడ్డారు.
చెన్నూరు నియోజకవర్గ అభివృద్ధిపై స్పందిస్తూ, గత ఎమ్మెల్యే బాల్క సుమన్ హయాం కంటే ఇప్పుడు వందల కోట్ల రూపాయలతో పనులు జరుగుతున్నాయని వివేక్ పేర్కొన్నారు. కాకా వెంకటస్వామి, గడ్డం వినోద్ హయాంలో జైపూర్ పవర్ ప్లాంట్ ద్వారా 5 వేల ఉద్యోగాలు కల్పించామని ఆయన గుర్తు చేశారు. మందమర్రి మున్సిపాలిటీ ఎన్నికల నిర్వహణ కోసం హైకోర్టులో కౌంటర్ దాఖలు చేసి ప్రణాళికలు సిద్ధం చేస్తున్నట్లు ఆయన వెల్లడించారు.
నియోజకవర్గంలో సీఎస్ఆర్ (కార్పొరేట్ సోషల్ రెస్పాన్సిబిలిటీ), డీఎంఎఫ్టీ (డిస్ట్రిక్ట్ మినరల్ ఫౌండేషన్ ట్రస్ట్) నిధులతో చేపట్టిన సీసీ రోడ్లు, డ్రైనేజీలు, ఖబరస్తాన్లు, షాదీఖానాల నిర్మాణ పనులను వేగంగా పూర్తి చేయాలని కలెక్టర్ను ఆదేశించానని మంత్రి తెలిపారు. ప్రజా సమస్యల పరిష్కారానికి, మౌలిక సదుపాయాల కల్పనకు తమ ప్రభుత్వం ప్రాధాన్యత ఇస్తుందని ఆయన స్పష్టం చేశారు.
