హోర్ముజ్ జలసంధిలో వాణిజ్య నౌకలపై ఇరాన్ దాడులకు పాల్పడటం, కువైట్లో డ్రోన్ దాడులు జరగడంతో అమెరికా అధ్యక్షుడు డొనాల్డ్ ట్రంప్ స్పందించారు. ఇరాన్ తీరును తప్పుబట్టిన ఆయన, ఆ దేశంపై మరింత కఠినంగా దాడులు చేస్తామని హెచ్చరించారు. ఇరాన్ భరించలేనంత తీవ్రంగా అమెరికా దాడులు ఉంటాయని ఆయన వ్యాఖ్యానించారు.
ఇరాన్ దాడుల వల్ల కువైట్లోని కీలక మౌలిక సదుపాయాలకు నష్టం వాటిల్లింది. కువైట్ సైన్యం ఈ డ్రోన్ దాడులను ఎదుర్కొంది. అయితే, ఈ ఘటనల్లో ఎటువంటి ప్రాణనష్టం జరగలేదని అధికారులు వెల్లడించారు. ఇరాన్ కాల్పుల విరమణ ఒప్పందాన్ని ఉల్లంఘిస్తోందని, వాణిజ్య నౌకలపై దాడులకు దిగుతోందని అమెరికా ప్రభుత్వం ఆగ్రహం వ్యక్తం చేసింది.
ఈ ఉద్రిక్తతల నేపథ్యంలో, ఆ ప్రాంతంలోని 10 దేశాల్లో ఉన్న అమెరికన్ల కోసం ప్రభుత్వం కొత్త భద్రతా హెచ్చరికలను జారీ చేసింది. ప్రయాణాల్లో అంతరాయాలు కలగవచ్చని, విమానాలు రద్దయ్యే అవకాశం ఉందని అమెరికన్లను అప్రమత్తం చేశారు. హోర్ముజ్ జలసంధిని తిరిగి తెరిపించేందుకు అమెరికా ప్రయత్నాలు చేస్తోంది.
