గతంలో హాలీవుడ్ సినిమాలకు ఇండియాలో తక్కువ ఆదరణ ఉండేది, కానీ ఇప్పుడు పరిస్థితి మారింది. ఇంగ్లీష్ సినిమాలు ఇండియన్ బాక్సాఫీస్ వద్ద భారీ వసూళ్లతో దూసుకుపోతున్నాయి. ముఖ్యంగా క్రిస్టోఫర్ నోలెన్ దర్శకత్వంలో వచ్చిన 'ది ఒడిస్సీ' సినిమా టాక్తో సంబంధం లేకుండా కలెక్షన్ల వర్షం కురిపిస్తోంది.
గ్రీకు కవి హోమర్ రాసిన కావ్యం ఆధారంగా రూపొందిన 'ది ఒడిస్సీ' ప్రపంచవ్యాప్తంగా ఆరు రోజుల్లోనే 3,000 కోట్ల రూపాయల వసూళ్లను సాధించింది. కేవలం ఇండియాలోనే ఈ చిత్రం 105 కోట్ల రూపాయల మార్కును దాటేసింది. పూర్తిగా ఐమాక్స్ (IMAX) కెమెరాలతో చిత్రీకరించిన ఈ సినిమా కోసం మెట్రో నగరాల్లో 3,000 రూపాయల వరకు టికెట్ ధర ఉన్నా, ప్రేక్షకులు ఎగబడి కొంటున్నారు.
మరోవైపు, యూట్యూబర్ కర్రీ బార్కర్ దర్శకత్వంలో మైఖేల్ జాన్స్టన్, ఇండే నవారెట్ ప్రధాన పాత్రల్లో నటించిన 'అబ్సెషన్' చిత్రం కూడా ఇండియాలో 87 కోట్ల రూపాయల వసూళ్లను రాబట్టింది. ఎటువంటి అంచనాలు లేకుండా విడుదలైనప్పటికీ ఈ సినిమా ప్రేక్షకులను బాగా ఆకట్టుకుంది.
ఇక స్పైడర్ మ్యాన్ ఫ్రాంచైజీకి ఇండియాలో ఉన్న క్రేజ్ దృష్ట్యా, 'స్పైడర్ మ్యాన్: బ్రాండ్ న్యూ డే' చిత్రంపై భారీ అంచనాలు ఉన్నాయి. ఈ సినిమా ప్రపంచవ్యాప్తంగా జూలై 31న విడుదల కానుండగా, మన దేశంలో ఒక రోజు ముందుగానే అంటే జూలై 30న ప్రేక్షకుల ముందుకు రానుంది.
