హైదరాబాద్ కేంద్రంగా ప్రతిపాదించిన హైస్పీడ్ బుల్లెట్ రైలు కారిడార్ల మార్గం ఎక్కడి నుంచి వెళ్తుందనే అంశంపై తెలంగాణలో రాజకీయ చర్చ మొదలైంది. శంషాబాద్ సమీపంలోని బహదూర్ గూడ మీదుగా రైలు మార్గం వెళ్తోందని, భూసేకరణ ప్రక్రియ వేగవంతమైందని వార్తలు రావడంతో స్థానికులు ఆందోళన చెందారు.
బహదూర్ గూడ ప్రాంతంలో తమ భూములు కోల్పోతామనే భయంతో ఉన్న రైతులను ప్రతిపక్ష బిఆర్ఎస్ (BRS) నేతలు పరామర్శించారు. పంట పొలాలు, ఇళ్లను ప్రభుత్వం స్వాధీనం చేసుకోవద్దని డిమాండ్ చేస్తూ, భూసేకరణ ప్రక్రియను నిలిపివేయాలని కోరుతూ వారు ప్రభుత్వానికి వినతిపత్రాలు సమర్పించారు.
ఈ వివాదంపై కేంద్ర గనుల శాఖ మంత్రి జి. కిషన్ రెడ్డి, రైల్వే మంత్రి అశ్వినీ వైష్ణవ్ సమావేశమయ్యారు. ఈ చర్చల అనంతరం రైల్వే శాఖ స్పందిస్తూ, హైస్పీడ్ రైలు మార్గాలకు సంబంధించి ఎలాంటి అలైన్‌మెంట్ (రైలు వెళ్లే మార్గం) ఇంకా ఖరారు కాలేదని తేల్చిచెప్పింది.
ప్రస్తుతం కేవలం సాంకేతిక అధ్యయనాలు (Survey & Alignment Studies) మాత్రమే జరుగుతున్నాయని రైల్వే మంత్రిత్వ శాఖ పేర్కొంది. ఏ రాష్ట్ర ప్రభుత్వానికి కూడా భూసేకరణ కోసం అధికారికంగా ఎలాంటి ప్రతిపాదనలు పంపలేదని అధికారులు స్పష్టం చేశారు.
మూడు కారిడార్లకు సంబంధించిన రూట్ మ్యాప్ విశ్లేషణలు పూర్తయిన తర్వాతే అధికారికంగా మార్గాన్ని ప్రకటిస్తామని రైల్వే శాఖ తెలిపింది. పూర్తి వివరాలను రైతులు, రాష్ట్ర ప్రభుత్వాల ముందు ఉంచుతామని, కాబట్టి భూసేకరణపై వస్తున్న పుకార్లను నమ్మవద్దని సూచించింది. కేంద్రం నుంచి అధికారిక ప్రకటన వచ్చే వరకు ఈ మార్గంపై స్పష్టత వచ్చే అవకాశం లేదు.
