గుజరాత్‌లోని దాహోడ్ జిల్లాలో దేవగఢ్ బరియా నియోజకవర్గ ఎమ్మెల్యే బచ్చుభాయ్ ఖబాడ్ నివాసాన్ని శుభ్రం చేయడానికి ఫైర్ ఇంజిన్‌ను (అగ్ని ప్రమాదాలు, అత్యవసర పరిస్థితుల్లో నీటిని చిమ్మే వాహనం) ఉపయోగించారు. ఈ వాహనం ఎమ్మెల్యే ఇంటి పైభాగాన్ని హై ప్రెజర్ వాటర్‌తో శుభ్రం చేస్తున్న వీడియో సోషల్ మీడియాలో విస్తృతంగా వ్యాపించింది.
ఈ ఘటనపై ప్రతిపక్షాలు తీవ్ర విమర్శలు చేశాయి. ప్రజా అవసరాల కోసం ఉండాల్సిన అత్యవసర వాహనాన్ని ఎమ్మెల్యే తన సొంత పనికి ఎలా వాడుకుంటారని వారు ప్రశ్నించారు. సోషల్ మీడియాలో కూడా ఎమ్మెల్యే తీరుపై నెటిజన్లు ఆగ్రహం వ్యక్తం చేశారు.
ఈ వివాదంపై దేవగఢ్ బరియా మున్సిపల్ చైర్‌పర్సన్ ఘమేష్ కలాల్ వివరణ ఇచ్చారు. ఎమ్మెల్యే కార్యాలయం నుంచి ఫైర్ ఇంజిన్ పంపాలని ఫోన్ కాల్ వచ్చిందని, ఏదైనా తీవ్రమైన సమస్య ఉందని భావించి వెంటనే వాహనాన్ని పంపానని ఆయన తెలిపారు.
అయితే, వాహనం ఎమ్మెల్యే ఇంటికి చేరుకున్నాక ఆయన సహచరులు ఇంటిని కడగాలని సిబ్బందిని కోరారు. ఇది తప్పుడు సమాచారంతో చేసిన కాల్ (హోక్స్ కాల్) అని గుర్తించిన ఫైర్ ఆఫీసర్ మయూర్ సింగ్ చౌహాన్, వెంటనే ఆపరేషన్‌ను నిలిపివేశారు.
ఈ ఘటనకు సంబంధించి ఎమ్మెల్యే ఖబాడ్ నుంచి రూ. 2,700 ఛార్జీలను అధికారులు వసూలు చేశారు. ఈ హోక్స్ కాల్ వెనుక ఉన్న కారణాలపై అధికారులు మరిన్ని విచారణలు జరుపుతున్నారు.
