ప్రతి నెల జీతం నుంచి కొంత మొత్తాన్ని పొదుపు చేసి, రిటైర్మెంట్ సమయంలో లేదా అత్యవసర పరిస్థితుల్లో ఆర్థిక భద్రత కల్పించేది ఎంప్లాయీస్ ప్రావిడెంట్ ఫండ్ (EPF). అయితే, గతంలో అర్హత ఉండి కూడా ఈపీఎఫ్ ఖాతా లేని ఉద్యోగుల కోసం ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) ప్రత్యేక అవకాశాన్ని కల్పిస్తోంది. జూన్ 29, 2026 నుంచి అమల్లోకి వచ్చిన ఈ ఎంప్లాయీస్ ఎన్రోల్మెంట్ క్యాంపెయిన్ (EEC 2026) ద్వారా అర్హులైన ఉద్యోగులను ఈపీఎఫ్ పరిధిలోకి తీసుకురావచ్చు.
ఈ క్యాంపెయిన్ కింద నమోదు చేసుకోవడానికి అక్టోబర్ 31, 2026 వరకు గడువు ఉంది. అయితే, చివరి నిమిషం వరకు వేచి ఉండకుండా సంస్థలు తమ ఉద్యోగుల రికార్డులను ముందుగానే పరిశీలించుకోవాలని ఈపీఎఫ్ఓ సూచించింది. యజమానులు తమ వద్ద ఉన్న జీతాల రికార్డులు, ఎంప్లాయ్మెంట్ వివరాలు, పాత ఈపీఎఫ్ రికార్డులను సరిచూసుకుని, నమోదు కాని అర్హులైన ఉద్యోగులను గుర్తించాల్సి ఉంటుంది.
ఈ పథకంలో చేరడానికి కొన్ని షరతులు ఉన్నాయి. యజమాని పేరు నమోదు చేసే సమయానికి ఉద్యోగి బతికి ఉండటంతో పాటు, అదే సంస్థలో పనిచేస్తూ ఉండాలి. అలాగే ఈఈసీ 2026 నిబంధనలను కూడా పాటించాల్సి ఉంటుంది. ఒకసారి ఈపీఎఫ్ ఖాతాలో చేరితే, ఉద్యోగికి పొదుపుతో పాటు నిబంధనల ప్రకారం పెన్షన్, ఇన్సూరెన్స్ వంటి సామాజిక భద్రతా ప్రయోజనాలు కూడా లభిస్తాయి.
నమోదు ప్రక్రియ కోసం ప్రతి ఉద్యోగి ఉమాంగ్ (UMANG) అనే ప్రభుత్వ సేవల యాప్ ద్వారా ఫేస్ అథెంటికేషన్ అంటే ముఖాన్ని గుర్తించే సాంకేతికతతో యూనివర్సల్ అకౌంట్ నంబర్ (UAN)ను రూపొందించుకోవాలి. ఆ తర్వాత యజమానులు ఎలక్ట్రానిక్ చలాన్ కమ్ రిటర్న్ (ECR) అనే డిజిటల్ చెల్లింపు విధానం ద్వారా ఈపీఎఫ్ వాటాలను జమ చేయాలి. ఈ ప్రక్రియను పూర్తి చేయడం ద్వారా అర్హులైన ఉద్యోగులు భవిష్యత్ ఆర్థిక ప్రయోజనాలను పొందవచ్చు.
