సూపర్ ఎల్నినో కారణంగా ఏలూరు జిల్లాలో సాధారణం కంటే 34 శాతం తక్కువ వర్షపాతం నమోదైనట్లు మంత్రి నాదెండ్ల మనోహర్ వెల్లడించారు. వర్షాభావం ఉన్న 15 మండలాలపై ప్రత్యేక దృష్టి సారించి, రైతులకు ప్రత్యామ్నాయ పంటల సాగుపై అవగాహన కల్పించాలని వ్యవసాయ శాఖ అధికారులను ఆయన ఆదేశించారు. ఇప్పటికే 66,293 పీఎండీఎస్ కిట్లు పంపిణీ చేయగా, అదనంగా మరో 35 వేల కిట్లను సిద్ధం చేయాలని, సబ్సిడీపై విత్తనాలు అందించాలని సూచించారు. అలాగే, అర్హులైన ప్రతి రైతు, కౌలు రైతు పంటల బీమా పథకంలో నమోదు అయ్యేలా చూడాలని స్పష్టం చేశారు.
జిల్లాలో గృహ నిర్మాణ పనులను వేగవంతం చేయాలని మంత్రి ఆదేశించారు. మంజూరైన ఇళ్లను ఏళ్లుగా స్వాధీనం చేసుకోని లబ్ధిదారుల కేటాయింపులను రద్దు చేసి, అర్హులైన వారికి అందించాలని, నిర్లక్ష్యం వహిస్తున్న వారిపై కేసులు నమోదు చేయాలని సూచించారు. గోదావరి, కృష్ణా డెల్టాల్లో తాగునీటి అవసరాలకు ప్రాధాన్యత ఇవ్వాలని, కాల్వల నుంచి అక్రమంగా నీటిని మళ్లించే వారిపై నిఘా బృందాలతో చర్యలు తీసుకోవాలని అధికారులకు సూచించారు.
ఏలూరు నగరంలో పారిశుద్ధ్య లోపాలను సరిదిద్దాలని, రోడ్లపై చెత్త, డ్రైన్లలో మురుగునీరు నిల్వ ఉండకుండా చూడాలని మంత్రి ఆదేశించారు. పంచాయతీరాజ్, రహదారులు, భవనాల శాఖల పరిధిలోని రోడ్ల మరమ్మతులను వెంటనే చేపట్టాలని చెప్పారు. 22ఏ వివాదాస్పద భూములకు సంబంధించిన వినతులపై తక్షణమే స్పందించాలని, ప్రకృతి వైపరీత్యాల సమయంలో ముందస్తు ప్రణాళికలతో సిద్ధంగా ఉండాలని అధికారులను ఆదేశించారు.
సమీక్షా సమావేశంలో జిల్లా కలెక్టర్ కె. వెట్రిసెల్వి, ఎమ్మెల్యేలు బడేటి రాధాకృష్ణయ్య, చింతమనేని ప్రభాకర్, పత్సమట్ల ధర్మరాజు పాల్గొన్నారు. సమావేశంలో తీసుకున్న నిర్ణయాలను తదుపరి సమీక్షా సమావేశానికి ముందే అమలు చేయాలని మంత్రి అధికారులను ఆదేశించారు. పీజీఆర్ఎస్ (ప్రజా ఫిర్యాదుల పరిష్కార వ్యవస్థ) ద్వారా వచ్చిన అర్జీలను అత్యంత ప్రాధాన్యతతో పరిష్కరించాలని ఆయన స్పష్టం చేశారు.
