ప్రపంచవ్యాప్తంగా టెక్ కంపెనీలు ఆర్టిఫిషియల్ ఇంటెలిజెన్స్ (AI) రంగంలో భారీగా పెట్టుబడులు పెడుతున్నాయి. ఈ క్రమంలో ఖర్చులు తగ్గించుకోవడానికి, సంస్థాగత మార్పులు (రీస్ట్రక్చరింగ్) చేయడానికి కంపెనీలు వేల సంఖ్యలో ఉద్యోగులను తొలగిస్తున్నాయి. దీంతో ఐటీ రంగంలోని ఉద్యోగుల్లో తీవ్ర భయాందోళనలు వ్యక్తమవుతున్నాయి.
ఈ నేపథ్యంలో, 30 ఏళ్ల వయసున్న ఒక సాఫ్ట్వేర్ ఇంజనీర్ ఏడాదిలో రెండుసార్లు లేఆఫ్ ఎదుర్కొన్నట్లు రెడ్డిట్ (Reddit) వేదికగా పంచుకున్నారు. గతేడాది చివర్లో మొదటిసారి ఉద్యోగం కోల్పోయిన ఆయన, ఆరు నెలల తర్వాత కొత్త కంపెనీలో చేరారు. అయితే, అక్కడ చేరిన రెండున్నర నెలలకే మళ్లీ తొలగింపునకు గురయ్యారు.
తన పనితీరు బాగున్నా, కేవలం కంపెనీ ఖర్చులు తగ్గించుకోవడంలో భాగంగానే తనను తొలగించారని సదరు ఇంజనీర్ తెలిపారు. ఈ పరిణామం తన ఆత్మవిశ్వాసాన్ని దెబ్బతీసిందని ఆయన ఆవేదన వ్యక్తం చేశారు. ఆర్థిక పరిస్థితి అంతంత మాత్రంగా ఉండటంతో, ఎక్కువ కాలం ఉద్యోగం లేకుండా ఉండే అవకాశం లేదని ఆయన వివరించారు.
ప్రస్తుతం ఆయన సాఫ్ట్వేర్ రంగంలోనే కొనసాగాలా లేక ఉద్యోగ భద్రత ఉన్న వేరే రంగానికి మారాలా అనే సందిగ్ధంలో ఉన్నారు. కెరీర్ మార్చుకోవాలని ఉన్నా, ఆర్థిక ఒత్తిడి అందుకు అడ్డంకిగా మారిందని ఆయన చెప్పారు. ఏఐ వల్ల డెవలపర్ల ఉద్యోగాలకు వెంటనే ముప్పు లేకపోయినా, కంపెనీలు ఉత్పాదకతను పెంచుకునే క్రమంలో భవిష్యత్తు అనిశ్చితంగా మారుతోందని ఆయన అభిప్రాయపడ్డారు.
ఉద్యోగ అవకాశాల కోసం స్వస్థలాన్ని వదిలి వేరే ప్రాంతాలకు వెళ్లాల్సి రావడం, ఆ తర్వాత ఇలాంటి పరిస్థితులు ఎదురుకావడం తనను ఇబ్బంది పెడుతోందని ఆయన పేర్కొన్నారు. తన కెరీర్ను ఎలా నిర్మించుకోవాలో, ఏ రంగంలోకి వెళ్తే బాగుంటుందో సలహాలు ఇవ్వాలని ఆయన తోటి ఉద్యోగులను కోరారు.
