ఢిల్లీలోని ద్వారకా నగర్లో ఆగష్టు 21, శుక్రవారం నాడు 30 ఏళ్ల నజియా ఖానం తన ఇంట్లో ఉరివేసుకుని మరణించింది. రక్షణ మంత్రిత్వ శాఖలో అసిస్టెంట్ సెక్షన్ ఆఫీసర్గా పనిచేస్తున్న నజియా, మూడు నెలల గర్భిణిగా ఉంది. ఆమె భర్త రాత్రి సమయంలో ఆసుపత్రికి తరలించగా, అప్పటికే ఆమె మరణించినట్లు వైద్యులు ధృవీకరించారు.
ఈ ఏడాది ఏప్రిల్ 11న అజ్మ్ అలీ ఖాన్తో నజియాకు వివాహం జరిగింది. పెళ్లైనప్పటి నుంచి తన భర్త అజ్మ్ అలీ ఖాన్, అత్త సామిన్ నిషా, మామ బాబర్ అలీ ఖాన్ మరియు ఇతర కుటుంబ సభ్యులు తనను శారీరకంగా, మానసికంగా వేధిస్తున్నారని నజియా తమతో ఫోన్లో చెప్పేదని ఆమె తల్లిదండ్రులు ఆరోపిస్తున్నారు. తమను చంపుతామని వారు బెదిరించేవారని కూడా వారు పోలీసులకు ఇచ్చిన ఫిర్యాదులో పేర్కొన్నారు.
మరోవైపు, ఈ ఘటనపై నజియా భర్త భిన్నమైన వివరణ ఇచ్చారు. తమ మధ్య గొడవ జరిగిన తర్వాత నజియా గదిలోకి వెళ్లి తలుపు వేసుకుందని ఆయన చెప్పారు. ఎంతకీ తలుపు తెరవకపోవడంతో ఇంటి యజమాని సహాయంతో నిచ్చెన ద్వారా బాల్కనీలోంచి లోపలికి వెళ్లి చూడగా, ఆమె చున్నీతో ఫ్యాన్కు ఉరివేసుకుని కనిపించిందని ఆయన తెలిపారు.
నజియా తల్లిదండ్రుల ఆరోపణలు, భర్త చెబుతున్న వివరాలను పరిగణనలోకి తీసుకున్న పోలీసులు కేసు నమోదు చేశారు. ప్రస్తుతం ఈ ఘటనపై దర్యాప్తు కొనసాగుతోంది.
