కాంగ్రెస్ పార్టీని వదిలి వెళ్లే ఆలోచన తనకు లేదని, వచ్చే ఎన్నికల్లో వరంగల్ తూర్పు నియోజకవర్గం నుంచే పోటీ చేస్తానని మాజీ మంత్రి కొండా సురేఖ స్పష్టం చేశారు. వరంగల్లోని ఎం.కె. నాయుడు హోటల్లో ఆదివారం జరిగిన కార్యకర్తల సమావేశంలో ఆమె మాట్లాడారు. పార్టీ మారుతున్నట్లు సోషల్ మీడియా, టీవీ ఛానళ్లలో వస్తున్న వార్తలను నమ్మవద్దని ఆమె కార్యకర్తలకు సూచించారు.
గత పది రోజులుగా తన భర్త కొండా మురళికి సంబంధించిన బెయిల్ వ్యవహారం వల్ల కార్యకర్తలకు అందుబాటులో ఉండలేకపోయానని సురేఖ వివరించారు. వినాయక చవితి నవరాత్రుల కారణంగా రాబోయే 15 రోజుల పాటు కార్యక్రమాలకు దూరంగా ఉండాల్సి వస్తుందని, అందుకే ముందుగానే ఈ సమావేశాన్ని ఏర్పాటు చేశానని ఆమె తెలిపారు. పదవులు వస్తాయి, పోతాయి కానీ ప్రజల్లో నిలిచేవారే నిజమైన నాయకులని ఆమె పేర్కొన్నారు.
రాజకీయాల్లో అవకాశవాద ధోరణులు పెరిగిపోయాయని, ఉదయం ఒక పార్టీలో ఉండి సాయంత్రానికి మరో పార్టీలోకి మారే నాయకులు తయారయ్యారని ఆమె విమర్శించారు. గతంలో వైఎస్ రాజశేఖరరెడ్డి నాయకత్వంపై నమ్మకంతో మంత్రి పదవికి రాజీనామా చేసిన విషయాన్ని ఆమె గుర్తుచేశారు. అప్పట్లో తమపై వచ్చిన విమర్శలను ధైర్యంగా ఎదుర్కొన్నామని, నమ్ముకున్న నాయకుడి కోసం పదవిని వదులుకున్నా ఏనాడూ బాధపడలేదని చెప్పారు.
మంత్రి పదవి నుంచి తనను తొలగించడం బాధ కలిగించిందని, అయితే పదవి లేకపోయినా ప్రజలకు సేవ చేయవచ్చని ఆమె అన్నారు. తన వద్దకు వచ్చిన ప్రజల్లో 99 శాతం మందికి న్యాయం చేసేందుకు ప్రయత్నించానని, తనపై ఎలాంటి అవినీతి మరక పడకుండా పనిచేశానని సురేఖ పేర్కొన్నారు. వరంగల్ తూర్పు నియోజకవర్గంలో అభివృద్ధి కార్యక్రమాలను కొనసాగిస్తూ ప్రజలకు మరింత చేరువగా ఉంటానని ఆమె హామీ ఇచ్చారు.
ఈ సందర్భంగా వరంగల్ తూర్పుకు చెందిన ఓ ఎమ్మెల్సీకి ఆమె సవాల్ విసిరారు. తనతో పోటీ పడటం కంటే ముందుగా సొంత 25వ డివిజన్లో గెలిచి చూపించాలని, వచ్చే ఎన్నికల్లో అక్కడ మహిళా అభ్యర్థిని నిలబెడతానని ఆమె ప్రకటించారు. రాబోయే కార్పొరేషన్ ఎన్నికల్లో 24 డివిజన్లలో కాంగ్రెస్ అభ్యర్థులను గెలిపించేందుకు కార్యకర్తలు కృషి చేయాలని ఆమె పిలుపునిచ్చారు.
