టీడీపీ కేంద్ర కార్యాలయంలో మీడియాతో చిట్చాట్ సందర్భంగా సీఎం చంద్రబాబు వైసీపీ నిరసనలపై కీలక వ్యాఖ్యలు చేశారు. నిరసన తెలిపే హక్కు అందరికీ ఉన్నప్పటికీ, చట్టాన్ని ఉల్లంఘిస్తూ ప్రజలకు అసౌకర్యం కలిగించే పద్ధతులను ప్రభుత్వం అంగీకరించదని ఆయన తేల్చి చెప్పారు.
వైసీపీ ఆధ్వర్యంలో జరుగుతున్న రిలే దీక్షలను ఉద్దేశించి చంద్రబాబు తీవ్ర విమర్శలు చేశారు. ఆ దీక్షల్లో డీఎస్సీ అభ్యర్థులెవరూ లేరని, కేవలం రౌడీలు, గంజాయి బ్యాచ్ మాత్రమే ఉన్నారని ఆయన ఆరోపించారు. డీఎస్సీ అభ్యర్థుల పేరుతో రాజకీయ నిరసనలు చేయడం సరికాదని ఆయన పేర్కొన్నారు.
కర్నూలులో జరిగిన నిరసనలపై స్పందిస్తూ, అక్కడ ఆందోళన చేసిన వారంతా ఇప్పటికే డీఎస్సీ ఉద్యోగాలకు ఎంపికైన టీచర్లేనని చంద్రబాబు వెల్లడించారు. గత ప్రభుత్వ హయాంలో జరిగిన నష్టం వల్లే ఉపాధ్యాయులు తమ ఆత్మగౌరవం కోసం ఐక్యంగా స్పందిస్తున్నారని ఆయన అభిప్రాయపడ్డారు.
బస్టాండ్లు, రహదారుల వద్ద నిరసనలు చేపట్టి ప్రజలకు ఇబ్బందులు కలిగిస్తే ప్రభుత్వం కఠినంగా వ్యవహరిస్తుందని చంద్రబాబు హెచ్చరించారు. చట్టపరమైన నిబంధనలను అతిక్రమించే ఎవరినైనా ఉపేక్షించే ప్రసక్తే లేదని ఆయన స్పష్టం చేశారు.
