న్యూఢిల్లీ వేదికగా జరిగిన బ్రిక్స్ సదస్సుకు రష్యా అధ్యక్షుడు వ్లాదిమిర్ పుతిన్, చైనా అధ్యక్షుడు షీ జిన్పింగ్, ఇరాన్ అధ్యక్షుడు మసౌద్ పెజెష్కియాన్తో పాటు మొత్తం 11 సభ్యదేశాల అధినేతలు హాజరయ్యారు. వీరితో పాటు మరో 10 భాగస్వామ్య దేశాల ప్రతినిధులు కూడా ఈ సమావేశాల్లో పాల్గొన్నారు.
ఈ సదస్సులో ప్రధాని నరేంద్ర మోదీ, పుతిన్, జిన్పింగ్ కలిసి ఉన్న ఫోటో ఒకటి ప్రపంచవ్యాప్తంగా చర్చనీయాంశమైంది. ఈ దిగ్గజ నేతలు ఒకే ఫ్రేమ్లో కనిపించడంపై మాజీ క్రికెటర్, కామెంటేటర్ రవిశాస్త్రి స్పందించారు. మోదీ దౌత్య నైపుణ్యాన్ని ఆయన కొనియాడారు.
సోషల్ మీడియాలో ఆ ఫోటోను షేర్ చేస్తూ, భారతీయుడిగా గర్వంగా ఉందని రవిశాస్త్రి పేర్కొన్నారు. పుతిన్, షీ జిన్పింగ్, ప్రధాని మోదీ మన దేశంలో కలిసి ఉండటం అద్భుతమైన అంతర్జాతీయ దౌత్యమని ఆయన అభివర్ణించారు. మోదీజీకి సెల్యూట్ అంటూ ఆయన తన పోస్ట్లో రాసుకొచ్చారు.
సదస్సులో భాగంగా రష్యా, చైనా అధ్యక్షులతో ప్రధాని మోదీ ద్వైపాక్షిక సమావేశాలు నిర్వహించారు. ఆదివారం దక్షిణాఫ్రికా అధ్యక్షుడు సిరిల్ రమఫోసాతో పాటు కజకిస్థాన్, ఫిలిప్పీన్స్, ఈజిప్ట్, బురుండి, ఉగాండా, నైజీరియా దేశాల నేతలతో కూడా ఆయన భేటీ అయ్యారు.
ఈ సమావేశాలు విజయవంతంగా ముగిశాయి. శనివారం బ్రిక్స్ దేశాల నేతలు అందరూ ఏకగ్రీవంగా 'న్యూఢిల్లీ డిక్లరేషన్ 2026'ను ఆమోదించారు. ఈ ఒప్పందంతో సదస్సు అధికారికంగా ముగింపు దశకు చేరుకుంది.
