ముఖ్యమంత్రి నారా చంద్రబాబు నాయుడు అధ్యక్షతన జరిగిన సీఆర్డీఏ (CRDA) అథారిటీ సమావేశంలో అమరావతి రాజధాని అభివృద్ధికి సంబంధించి పలు కీలక నిర్ణయాలు తీసుకున్నారు. సమావేశం అనంతరం మంత్రి పొంగూరు నారాయణ మీడియాతో మాట్లాడుతూ, రాజధానిలో ఇన్నర్ రింగ్ రోడ్డు మరియు రైల్వే ట్రాక్ నిర్మాణ ప్రతిపాదనలకు ఆమోదం లభించిందని వెల్లడించారు.
పల్నాడు జిల్లాలోని ఇనాం భూములను స్వాధీనం చేసుకునేందుకు అవసరమైన నిధులను దేవాదాయ శాఖకు బదిలీ చేసేందుకు సీఆర్డీఏ అనుమతి ఇచ్చింది. అలాగే, హ్యాపీ నెస్ట్ ప్రాజెక్టుకు సంబంధించి రేరా (RERA) ఫీజు చెల్లింపులకు కూడా గ్రీన్ సిగ్నల్ లభించింది. భూములు ఇచ్చిన రైతులకు చెల్లించాల్సిన యాన్యుటీపై కూడా ఈ సమావేశంలో నిర్ణయం తీసుకున్నట్లు మంత్రి వివరించారు.
నగరంలో పర్యాటక రవాణా సౌకర్యాలను మెరుగుపరిచేందుకు విజయవాడ రైల్వే స్టేషన్, బస్టాండ్, కనకదుర్గమ్మ ఆలయం, భవానీ ఐలాండ్ నుంచి వెంకటపాలెంలోని శ్రీ వెంకటేశ్వరస్వామి ఆలయం వరకు రోప్వే ఏర్పాటు చేసే ప్రతిపాదనను ప్రభుత్వం పరిశీలిస్తోంది. కృష్ణా నదిపై అవసరమైన వంతెనల నిర్మాణానికి ప్రత్యేక కమిటీని ఏర్పాటు చేయాలని కూడా నిర్ణయించారు.
గత ప్రభుత్వ హయాంలో నిలిచిపోయిన అమరావతి పనులు, కూటమి ప్రభుత్వం అధికారంలోకి వచ్చిన తర్వాత వేగంగా సాగుతున్నాయి. ఈ సమావేశంలో తీసుకున్న నిర్ణయాల అమలు ద్వారా రాజధాని నిర్మాణ పనులను మరింత వేగవంతం చేసేందుకు ప్రభుత్వం చర్యలు చేపడుతోంది.
