కేంద్ర ప్రభుత్వం కార్పొరేట్ సంస్థలకు అనుకూలంగా వ్యవహరిస్తూ, కార్మిక మరియు రైతు వ్యతిరేక విధానాలను వేగంగా అమలు చేస్తోందని రైతు సంఘం రాష్ట్ర ఉపాధ్యక్షుడు, మాజీ ఎమ్మెల్యే జూలకంటి రంగారెడ్డి విమర్శించారు. స్వాతంత్ర్య పోరాట స్ఫూర్తితో దేశ ఆర్థిక సార్వభౌమత్వాన్ని కాపాడుకోవాలని, ఇందులో భాగంగా ఆగస్టు 10న రాష్ట్రవ్యాప్తంగా 'జైల్ భరో' కార్యక్రమాన్ని విజయవంతం చేయాలని ఆయన కోరారు. ఎం వి ఎన్ విజ్ఞాన కేంద్రంలో జరిగిన జిల్లా సదస్సులో ఆయన ఈ పిలుపునిచ్చారు.
బిజెపి ప్రభుత్వం లేబర్ కోడ్ల అమలుకు ఫైనల్ రూల్స్ను నోటిఫై చేయడంతో పాటు, విద్యుత్ సవరణ బిల్లు-2025 మరియు విత్తన చట్ట సవరణలను ప్రతిపాదించిందని రంగారెడ్డి పేర్కొన్నారు. సులభతర వ్యాపారం పేరుతో కార్మిక చట్టాలను రద్దు చేసి, పని దినాన్ని 8 గంటల నుండి 12 గంటలకు పెంచుకునే స్వేచ్ఛను యాజమాన్యాలకు కల్పించారని ఆయన ఆరోపించారు. 300 మంది లోపు కార్మికులున్న కంపెనీల్లో నోటీసు లేకుండా తొలగించే 'హైర్ అండ్ ఫైర్' విధానం ఉద్యోగ భద్రతను దెబ్బతీస్తుందని ఆయన ఆవేదన వ్యక్తం చేశారు.
అమెరికా, బ్రిటన్, న్యూజిలాండ్తో కేంద్రం చేసుకున్న స్వేచ్ఛా వాణిజ్య ఒప్పందాల వల్ల 32 దేశాల నుండి దిగుమతులు పెరిగాయని రంగారెడ్డి తెలిపారు. జీరో సుంకంతో దిగుమతులు రావడం వల్ల దేశీయ వ్యవసాయోత్పత్తుల ధరలు పడిపోయి రైతులు నష్టపోయే ప్రమాదం ఉందని ఆయన హెచ్చరించారు. ఈ లేబర్ కోడ్లను ఉపసంహరించే వరకు పోరాటం కొనసాగిస్తామని సదస్సులో నిర్ణయించారు.
ఈ సదస్సు అనంతరం నీట్ పేపర్ లీకేజీని నిరసిస్తూ నల్గొండ పట్టణంలోని సుభాష్ విగ్రహం వద్ద నిరసన కార్యక్రమం చేపట్టారు. ఈ కార్యక్రమంలో సిఐటియు జిల్లా కార్యదర్శి ఎండి సలీం, రైతు సంఘం జిల్లా కార్యదర్శి వి.వెంకటేశ్వర్లుతో పాటు పలువురు సంఘ నాయకులు పాల్గొన్నారు.
