మహారాష్ట్ర పోలీస్ శాఖలో పనిచేస్తున్న ఇద్దరు మహిళా కానిస్టేబుళ్లు మూడేళ్లుగా ప్రేమించుకుంటున్నారు. ఆగస్టు 30న పూణెలోని ఆళందిలో వివాహం చేసుకోవాలని నిర్ణయించుకుని, తోటి పోలీసులకు శుభలేఖలు కూడా పంపిణీ చేశారు. ఈ విషయం తెలియడంతో వారి కుటుంబ సభ్యులు ఉన్నతాధికారులను కలిసి అభ్యంతరం వ్యక్తం చేశారు.
దీంతో రంగంలోకి దిగిన ఉన్నతాధికారులు, ఈ వ్యవహారంపై ఆచితూచి స్పందిస్తున్నారు. ప్రేమ, పెళ్లి అనేది వ్యక్తిగత విషయమని భావిస్తున్నప్పటికీ, కుటుంబ సభ్యుల ఒత్తిడి నేపథ్యంలో ఆ ఇద్దరు కానిస్టేబుళ్లకు కౌన్సెలింగ్ ఇవ్వాలని నిర్ణయించారు. ఈ కౌన్సెలింగ్ సమయంలోనే, వారిలో ఒకరు లింగ మార్పిడి చికిత్స కోసం ముంబైలోని ఆసుపత్రికి వెళ్లినట్లు వెలుగులోకి వచ్చింది.
మరోవైపు, ఇదే శాఖలో పనిచేస్తున్న ఒక మహిళా పోలీస్ అధికారిణి లింగ మార్పిడి ద్వారా పురుషుడిగా మారారు. తనను రికార్డుల్లో మహిళా అధికారిగా కాకుండా పురుష అధికారిగా నమోదు చేయాలని ఆమె ప్రభుత్వానికి దరఖాస్తు చేసుకున్నారు. దీనికి ప్రభుత్వ అనుమతి ఉందని ఆమె చెబుతున్నారు.
అయితే, నియామక సమయంలో మహిళా పోలీసులకు వర్తించే ప్రత్యేక నిబంధనలు, రాయితీలను మార్చడంపై స్పష్టత లేకపోవడంతో ఈ దరఖాస్తు పెండింగ్లో ఉంది. ఈ రెండు ఘటనలు ఇప్పుడు మహారాష్ట్ర పోలీస్ శాఖలో చర్చనీయాంశంగా మారాయి. గతంలో ఇలాంటి పరిస్థితులను తాము ఎప్పుడూ చూడలేదని తోటి పోలీసులు పేర్కొంటున్నారు.
ప్రస్తుతానికి పెళ్లిని వాయిదా వేసిన ఆ ఇద్దరు కానిస్టేబుళ్లు, ఉన్నతాధికారుల తదుపరి సూచనల కోసం వేచి చూస్తున్నారు. ఈ రెండు విభిన్న ఘటనలపై ఎలాంటి నిర్ణయం తీసుకోవాలో అర్థం కాక అధికారులు తికమక పడుతున్నారు.
