కార్డిఫ్ మైదానంలో జరిగిన ఈ మ్యాచ్లో మొదట బ్యాటింగ్ చేసిన భారత్ 44 ఓవర్లలో 233 పరుగులకు ఆలౌటైంది. శ్రేయస్ అయ్యర్ 66 పరుగులు, విరాట్ కోహ్లీ 65 పరుగులతో హాఫ్ సెంచరీలు సాధించినప్పటికీ, మిగిలిన బ్యాటర్లు విఫలమయ్యారు. ఇంగ్లాండ్ బౌలర్లలో జోఫ్రా ఆర్చర్, గస్ అట్కిన్సన్ చెరో మూడు వికెట్లు తీసి భారత్ను కట్టడి చేశారు.
అనంతరం 234 పరుగుల లక్ష్యాన్ని ఛేదించే క్రమంలో ఇంగ్లాండ్ 44.1 ఓవర్లలో 6 వికెట్లు కోల్పోయి విజయం సాధించింది. జో రూట్ 99 పరుగులతో నాటౌట్గా నిలిచి జట్టును గెలిపించాడు. భారత బౌలర్లలో గుర్నూర్ బ్రార్ రెండు వికెట్లు తీయగా, ప్రసిద్ధ్ కృష్ణ, జస్ప్రీత్ బుమ్రా, శివమ్ దూబె, అక్షర్ పటేల్ తలా ఒక వికెట్ పడగొట్టారు.
మ్యాచ్ అనంతరం కెప్టెన్ శుభ్మన్ గిల్ మాట్లాడుతూ, మిడిల్ ఆర్డర్ వైఫల్యం వల్లే ఓటమి ఎదురైందని పేర్కొన్నాడు. 25 ఓవర్ల వరకు 300 నుంచి 310 పరుగులు చేస్తామని భావించామని, అయితే మధ్య ఓవర్లలో వరుసగా వికెట్లు కోల్పోవడం దెబ్బతీసిందని తెలిపాడు. వాషింగ్టన్ సుందర్ గాయపడటం కూడా జట్టు వ్యూహాలను ప్రభావితం చేసిందని, దీనివల్ల ప్రధాన బౌలర్లనే ఎక్కువగా ఉపయోగించాల్సి వచ్చిందని వివరించాడు.
జో రూట్ ఇన్నింగ్స్ను ప్రశంసించిన గిల్, ఒకవేళ తాము 300కు పైగా లక్ష్యాన్ని నిర్దేశించి ఉంటే ఫలితం మరోలా ఉండేదని అభిప్రాయపడ్డాడు. తదుపరి మ్యాచ్ల్లో చిన్న చిన్న భాగస్వామ్యాలు నెలకొల్పి ఇన్నింగ్స్ను ముందుకు తీసుకెళ్తామని గిల్ స్పష్టం చేశాడు.
