ఇరాన్ లోని టెహరాన్ లో సుప్రీం నేత అయాతుల్లా అలీ ఖమేనీ అంత్యక్రియల ఘట్టం ఆరంభమైంది. ఇజ్రాయెల్ దాడుల భయాల కారణంగా లక్షలాది ప్రజలు తుది వీడ్కోలుకు జాతర రీతిలో తరలివచ్చారు. తమ నేత పార్థివ దేహాన్ని చూసి సంతృప్తి చెంది వెళ్లుతున్నారు.
అంత్యక్రియల ఘట్టానికి ముందు, స్థానిక మసీదు సముదాయంలో ప్రత్యేక ప్రార్థనలు నిర్వహించారు. ఖమేనీ ముగ్గురు కుమారులు మొస్తాఫా, మొయిసమ్, మసౌద్ ఖమేనీలు విషాద వదనాలతో నిలబడి ఉన్నారు. ఈ వీడియోలు సోషల్ మీడియాలో వెల్లువెత్తాయి.
కానీ ఖమేనీకి ప్రకటిత వారసుడు మొజ్తాబా ఖమేనీ ఈ కార్యక్రమంలో ఎక్కడా కన్పించలేదు. ఆయన భార్య కూడా హాజరు కాలేదు. భద్రతాపరమైన కారణాల వల్ల వారి హాజరు లేకపోవడం పలు అనుమానాలకు దారితీసింది. మొజ్తాబా ఇప్పటివరకు బహిరంగంగా ప్రజల ముందుకు రాలేదు.
ఖమేనీకి మొత్తం నలుగురు కుమారులు, ఇద్దరు కూతుళ్లు. వీరిలో ఒక కూతురు ఇజ్రాయెల్ దాడుల్లో హతులయ్యారు. మరో కూతురు అంత్యక్రియల్లో హాజరు కాలేదు, కానీ మీడియా ఆమె రహస్యంగా నివాళులు అర్పించి వెళ్లినట్లు తెలిపింది.
ఇరాన్ అధ్యక్షుడు పెజెష్కియాన్, స్పీకర్ ఘాలిబఫ్, విదేశాంగ మంత్రి అరాగ్చి, ఐఆర్జిసి చీఫ్ అహ్మద్ వాహిదీలు విషాద వదనాలతో కన్పించారు. అరాగ్చి బిగ్గరగా రోదించారు. ప్రజలు అమెరికా, ఇజ్రాయెల్ పై ప్రతీకారం తీసుకోవాలని నినదించారు. టెహరాన్ వీధులు జనసంద్రంతో నిండిపోయాయి.
