ప్రయాణ సమయంలో ఏదైనా అత్యవసర పరిస్థితి ఎదురైతే, వాహనంలో ఉన్న ఎమర్జెన్సీ బటన్ నొక్కితే చాలు.. వెంటనే పోలీసులు, రవాణాశాఖ అధికారులకు సమాచారం చేరుతుంది. వీఎల్టీడీ (వాహన లొకేషన్ ట్రాకింగ్ డివైజ్) అనే ఈ సాంకేతిక పరికరం జీపీఎస్ ఆధారంగా పనిచేసి, వాహనం ఉన్న ప్రాంతాన్ని క్షణాల్లో గుర్తించి సహాయక చర్యలు ప్రారంభిస్తుంది.
వాహనం ఇంజిన్ భాగంలో అమర్చే ఈ పరికరానికి లింక్ చేసి, ప్రయాణికులు కూర్చునే చోట ఎమర్జెన్సీ బటన్ ఉంటుంది. ప్రమాదం, అనారోగ్య సమస్య లేదా భద్రతాపరమైన ఇబ్బంది వచ్చినప్పుడు ఆ బటన్ నొక్కితే, వాహనం ఎక్కడ ఉందో, ఏ దిశలో వెళ్తోందో రియల్టైమ్లో అధికారులకు తెలుస్తుంది. దీంతో బాధితుల వద్దకు వేగంగా చేరుకోవడమే కాకుండా, అంబులెన్స్ వంటి అత్యవసర సేవలను అందించడం సాధ్యమవుతుంది.
రెంట్ కార్లు, విద్యాసంస్థల బస్సులు, ట్రావెల్స్ వాహనాలు, నేషనల్ పర్మిట్ కలిగిన సరకు రవాణా లారీలు వంటి అన్ని వాణిజ్య వాహనాల్లో ఈ పరికరం తప్పనిసరి. 2019 జనవరి 1 నుంచి ఈ నిబంధన అమల్లోకి రాగా, కొత్త వాహనాల్లో తయారీ దశలోనే దీనిని అమర్చుతున్నారు. అయితే, 2019కి ముందు రిజిస్టర్ అయిన పాత వాణిజ్య వాహనాల్లో కూడా ఇప్పుడు వీఎల్టీడీని అమర్చుకోవడం తప్పనిసరి చేశారు.
రాష్ట్ర స్థాయిలో ఏర్పాటు చేస్తున్న కమాండ్ కంట్రోల్ సెంటర్ల ద్వారా ఈ వాహనాల కదలికలను నిరంతరం పర్యవేక్షిస్తారు. మహిళలు, చిన్నారులు ప్రయాణించే వాహనాల్లో ఈ విధానం భద్రతను పెంచడమే కాకుండా, అక్రమ రవాణాను అడ్డుకోవడంలోనూ కీలక పాత్ర పోషిస్తుంది. ఇకపై ఈ టెక్నాలజీ వాహనదారులకు ప్రాణరక్షక కవచంగా మారనుంది.
