2000వ దశకంలో తెలుగు, కన్నడ చిత్ర పరిశ్రమల్లో అగ్ర కథానాయికగా వెలుగొందిన ప్రేమ, ఇటీవల తన కెరీర్ గురించి ఆసక్తికర విషయాలను వెల్లడించారు. ముఖ్యంగా కన్నడ హీరో, దర్శకుడు ఉపేంద్రతో కలిసి పనిచేసినప్పటి జ్ఞాపకాలను ఆమె గుర్తుచేసుకున్నారు.
ఉపేంద్ర దర్శకత్వంలో తాను నటించిన చిత్రంలో రవీనా టాండన్, దామినిలతో పాటు ప్రధాన పాత్ర పోషించానని ప్రేమ తెలిపారు. కేవలం 16 నుంచి 18 ఏళ్ల వయసులోనే అంతటి పవర్ ఫుల్, ఎమోషనల్ పాత్రను పోషించడం తనకు పెద్ద సవాలుగా మారిందని ఆమె పేర్కొన్నారు. సెట్స్లో ప్రతి సన్నివేశం సహజంగా రావాలని ఉపేంద్ర కోరుకునేవారని, ఇందుకోసం నిప్పులు, గాజు పెంకుల మధ్య డూప్లు లేకుండా రియలిస్టిక్ షాట్స్ కోసం ఆయన తీవ్రంగా శ్రమించేవారని ఆమె వివరించారు.
షూటింగ్ సమయంలో సన్నివేశాల తీవ్రత కారణంగా ఉపేంద్రకు, రవీనా టాండన్కు మధ్య చిన్నపాటి వాగ్వాదాలు కూడా జరుగుతుండేవని ప్రేమ సరదాగా గుర్తుచేశారు. ఆ కష్టమైన సీన్లు తనను నటిగా మరింత దృఢంగా మార్చాయని ఆమె చెప్పారు. ఉపేంద్ర అద్భుతమైన నటుడే కాకుండా, వినూత్న ఆలోచనలు కలిగిన గొప్ప దర్శకుడని ఆమె ప్రశంసించారు.
ఉపేంద్రతో పాటు కలెక్షన్ కింగ్ మోహన్ బాబుతో కలిసి నటించిన 'రాయలసీమ రామన్న చౌదరి' చిత్రం జ్ఞాపకాలను కూడా ఆమె పంచుకున్నారు. మోహన్ బాబు క్రమశిక్షణ, ఆయన బాడీ లాంగ్వేజ్ గురించి ప్రేమ ఈ సందర్భంగా ప్రస్తావించారు.
