భారత కాలమానం ప్రకారం మంగళవారం మధ్యాహ్నం 12.30 గంటలకు అమెరికాకు చెందిన బోయింగ్ సి-17 గ్లోబ్మాస్టర్ యుద్ధ విమానం మాస్కోలో దిగింది. ఇది సైనిక అవసరాల కోసం ఉపయోగించే రవాణా విమానం. ఈ విమానం మంగళవారం ఉదయం లాట్వియా దేశంలోని రిగా నగరం నుంచి బయల్దేరి రష్యాకు చేరుకుంది.
ఈ విమానం ఆగష్టు 23న అమెరికాలోని వాషింగ్టన్ డీసీలో ఉన్న స్ప్రింగ్స్ ఎయిర్బేస్ నుంచి బయల్దేరింది. మొదట రిగాకు వెళ్లిన ఈ విమానం, అక్కడి నుంచి రష్యాకు చేరుకోవడం గమనార్హం. గత జనవరిలో అమెరికా ప్రతినిధులు రష్యాలో పర్యటించినప్పుడు మాత్రమే చివరిసారిగా ఒక అమెరికన్ యుద్ధ విమానం అక్కడికి వెళ్లింది.
ప్రస్తుతం ఉక్రెయిన్, రష్యా మధ్య యుద్ధం తీవ్రంగా కొనసాగుతోంది. ఈ నేపథ్యంలో అమెరికా ప్రత్యేక ప్రతినిధులు స్టీవెన్ విట్కాఫ్, జేర్డ్ కుష్నర్ త్వరలో రష్యాలో పర్యటించాల్సి ఉంది. ఈ చర్చల కోసమే విమానం వచ్చిందా అనే సందేహాలు వ్యక్తమవుతున్నాయి.
అయితే, ఈ విమానం రాకపై అమెరికా ప్రభుత్వం ఇప్పటివరకు ఎలాంటి అధికారిక ప్రకటన చేయలేదు. మరోవైపు, ఈ విమానం గురించి తమకు ఏమీ తెలియదని రష్యా ప్రభుత్వం పేర్కొంది. అది కార్గో విమానమా లేదా ప్యాసింజర్ విమానమా అనే విషయం కూడా తమకు తెలియదని రష్యా అధికారులు తెలిపారు.
రెండు దేశాల మధ్య శాంతి చర్చలు నిలిచిపోయిన తరుణంలో ఈ విమానం రాక చర్చనీయాంశంగా మారింది. ఈ విమానం ఎందుకు రష్యాకు వచ్చింది అనే అంశంపై అమెరికా, రష్యా దేశాల నుంచి స్పష్టమైన ప్రకటన రావాల్సి ఉంది.
