నీట్ (NEET) పేపర్ లీకేజీ ఘటనపై ఆందోళన చేస్తున్న విద్యార్థులకు క్రికెట్ దిగ్గజం సచిన్ టెండూల్కర్ మద్దతు తెలిపారు. విద్యా వ్యవస్థలో ప్రక్షాళన కోరుతూ జంతర్ మంతర్ వద్ద నిరసన చేపడుతున్న విద్యార్థుల పక్షాన నిలుస్తూ, ఆయన ఎక్స్ (X) వేదికగా తన అభిప్రాయాలను పంచుకున్నారు.
తన తండ్రి ఒక ప్రొఫెసర్ అని గుర్తు చేసుకున్న సచిన్, ఓడిపోయినా పర్వాలేదు కానీ చీటింగ్ చేయకూడదని, విజయం కోసం దగ్గరి దారులు వెతకకూడదని ఆయన నేర్పిన పాఠాన్ని ప్రస్తావించారు. కష్టం కంటే ఫలితాలకే ప్రాధాన్యం ఇవ్వడం వల్ల విద్యార్థులు షార్ట్కట్లను నమ్ముతున్నారని, ఇది సమాజానికి మంచిది కాదని ఆయన పేర్కొన్నారు.
కష్టపడి చదివిన విద్యార్థులకు తగిన ఫలితం దక్కనప్పుడు వారు నిరాశకు లోనవుతారని, అటువంటి పరిస్థితులు పునరావృతం కాకుండా చూడాల్సిన బాధ్యత మనందరిపై ఉందని సచిన్ అభిప్రాయపడ్డారు. యువత మన దేశ విజయానికి ఇంధనం వంటివారని, వారి కలలకు రక్షణ కల్పించేలా ఒక పరిష్కారాన్ని కనుగొంటామనే నమ్మకం తనకు ఉందని ఆయన తెలిపారు.
తల్లిదండ్రులు, ఉపాధ్యాయులు, స్కూల్ నిర్వాహకులు అందరూ కలిసి శ్రమకు ఫలితం, నిజాయతీకి ప్రోత్సాహం దక్కే సంస్కృతిని ఏర్పాటు చేయాలని సచిన్ పిలుపునిచ్చారు. విద్యార్థుల భవిష్యత్తును కాపాడే దిశగా సమాజం బాధ్యతాయుతంగా వ్యవహరించాలని ఆయన సూచించారు.
