ఒక దారుణమైన అత్యాచారం జరిగిన తర్వాత, నిందితులను పట్టుకునే క్రమంలో పోలీసులకు ఎదురయ్యే సవాళ్లతో ఈ కథ మొదలవుతుంది. డీసీపీ రామన్ కుమార్ (పృథ్వీరాజ్ సుకుమారన్) నేతృత్వంలోని బృందం, నిందితులు తమ ఆయుధాలను లాక్కోవడంతో ఆత్మరక్షణ కోసం వారిని చంపేశామని చెబుతుంది. ఈ ఎన్కౌంటర్ ఘటనపై మానవ హక్కుల సంఘం (హ్యూమన్ రైట్స్) ఒత్తిడి పెంచడంతో, విచారణ కోసం డీసీపీ అజూనీ కోహ్లీ (కరీనా కపూర్ ఖాన్) నేతృత్వంలో ప్రత్యేక దర్యాప్తు బృందాన్ని ప్రభుత్వం ఏర్పాటు చేస్తుంది.
సినిమా ప్రారంభంలో కథ నెమ్మదిగా సాగినా, ఆ తర్వాత కొన్ని థ్రిల్ మూమెంట్స్ ఆసక్తిని కలిగిస్తాయి. ముఖ్యంగా పోలీసులకు, నేరస్థులకు మధ్య జరిగే కొన్ని సన్నివేశాలు, అలాగే క్షితీ జోగ్ నటించిన ఎమోషనల్ సీన్ బాగుంటాయి. న్యాయం అంటే ఏమిటో తనకంటూ సొంత నిర్వచనం ఉన్న పోలీసు అధికారిగా పృథ్వీరాజ్ సుకుమారన్ తన నటనతో ఆకట్టుకున్నారు.
అయితే, ఈ సినిమా ఆశించిన స్థాయిలో ప్రేక్షకులను మెప్పించలేకపోయింది. ఇద్దరు ప్రధాన పాత్రల మధ్య ఉండాల్సిన డ్రామా, కథనం చాలా బలహీనంగా ఉండటం సినిమా ఫలితాన్ని దెబ్బతీసింది. ముఖ్యంగా కరీనా కపూర్ ఖాన్కు తగినంత స్క్రీన్ స్పేస్ దక్కకపోవడం, సెకండాఫ్ బోర్ కొట్టడం వంటివి సినిమాకు ప్రతికూలంగా మారాయి.
దర్శకురాలు మేఘనా గుల్జార్ ఈ చిత్రాన్ని ఆసక్తికరంగా మలచడంలో విఫలమయ్యారు. ఫేక్ ఎన్కౌంటర్ చుట్టూ ఉన్న భిన్నాభిప్రాయాలపై లోతైన చర్చ జరపకుండా, ఈ అంశాన్ని పూర్తిగా వాడుకోకపోవడం నిరాశ కలిగిస్తుంది. నిర్మాణ విలువలు, సంగీతం, కెమెరా పనితనం బాగున్నప్పటికీ, బలహీనమైన క్లైమాక్స్ కారణంగా ఈ థ్రిల్లర్ ప్రేక్షకులను ఆకట్టుకోదు.
