నీట్ పేపర్ లీకేజీకి వ్యతిరేకంగా ఢిల్లీలోని జంతర్ మంతర్ వద్ద కాక్రోచ్ జనతా పార్టీ (సీజేపీ) నిర్వహిస్తున్న నిరసనలకు దూరంగా ఉండాలని ఢిల్లీ విశ్వవిద్యాలయం (డీయూ) గురువారం, జులై 23న ఒక ప్రకటన విడుదల చేసింది. విద్యార్థులు, అధ్యాపకులు తమ భద్రతకు ప్రాధాన్యత ఇవ్వాలని, చట్టాన్ని గౌరవించాలని వర్సిటీ సూచించింది.
సుప్రీంకోర్టు ఆదేశాల మేరకు జంతర్ మంతర్ వద్ద జరిగే నిరసనలు, సమావేశాలు కఠిన నిబంధనల పరిధిలో ఉంటాయని డీయూ పేర్కొంది. ఇటువంటి చట్టవిరుద్ధమైన ప్రదర్శనల్లో పాల్గొనడం వల్ల విద్యార్థులపై చట్టపరమైన చర్యలు తీసుకునే అవకాశం ఉందని, ఇది వారి విద్యా, వృత్తిపరమైన భవిష్యత్తుపై ప్రతికూల ప్రభావం చూపుతుందని హెచ్చరించింది. సోషల్ మీడియాలో వస్తున్న తప్పుడు సమాచారాన్ని నమ్మవద్దని విద్యార్థులకు సూచించింది.
కాక్రోచ్ జనతా పార్టీ జులై 20న చేపట్టిన పార్లమెంట్ మార్చ్ (చలో సంసద్) కార్యక్రమం హింసాత్మకంగా మారిన నేపథ్యంలో ఈ హెచ్చరికలు జారీ అయ్యాయి. ఆ రోజు నిరసనకారులపై పోలీసులు లాఠీచార్జ్ చేయడంతో పాటు టియర్ గ్యాస్ ప్రయోగించారు. ఈ ఘటనలో పదుల సంఖ్యలో నిరసనకారులు గాయపడ్డారు.
పోలీసుల చర్యలకు నిరసనగా జులై 24న దేశవ్యాప్త ఆందోళనలకు సీజేపీ పిలుపునిచ్చింది. ఈ నేపథ్యంలో విద్యార్థులు అప్రమత్తంగా ఉండాలని, అనవసరమైన వివాదాలకు దూరంగా ఉండాలని ఢిల్లీ విశ్వవిద్యాలయం స్పష్టం చేసింది.
